Serchhip-a chiahpuam buaina chu sum dahnaten rul tura intiamkama an ziah hnuah sum dahtu (depositor)-te duh dan angin thubuai siam ni lovin, chhui zui hna tihtawp a ni.
Mi \henkhatin Jenny Malsawmtluangi, Serchhip Dinthar Veng hnena a pung uma sum an dah chungchang hi hun eng emaw chen Serchhip Police hian a chhui zui hna an thawh hnuah, Money Depositor Group intite hian Jenny chunga thubuai ziak lut lo tura ngenna an thlen angin case siam a ni lo a. Jenny hnena sum dahtu (depositor)-te duh dan angin hemi chungchang chhuina leh hma an lakna chu tihtawp a nih tak thu thudawn a ni.
Thudawnna chuan, Money Depositor Group hian Jenny hnena an pawisa dah te hi hmuh let leh vek an duh ber thu leh a tlem thei ang ber hloh an duh thu Serchhip police hnena an thlen angin, Jenny te nena an pawisa a batsak an pek let/rulh lehna turin ruahmanna siam a ni. An ruahman ang chuan kum sarih chhunga an pawisa a batte hi rulh zawh vek a intiam a. Pawisa hmuh let lehna tura ruahmanna siam a nih laia criminal case siama Jenny-i mana jail tantir emaw, Mizoram Protection of Interest of Depositor (MPID) hmanga hmalak emaw a nih chuan harsatna a thleng thei nia an hriat avangin hetianga hma la lo turin an ngen niin sum dahtu pawlte hian an sawi.
Serchhip-a judicial magistrate hmaa affidavit-a Jenny Malsawmtluangi’n intiamkamna a ziah danin, kum 2017 a\ang mi 67 hnen a\angin Rs 4,75,50,800 a hmansak thu te, heng pawisate hi a batsak thu leh rul leh ngei turin intiamna a ziak a. A intiam ang hian kum khatna chhungin zaa 30, kum hnihna leh kum thumna chhungin zaa 20 ve ve, kum lina leh ngana chhungin zaa 10 ve ve leh kum rukna leh kum sarihnaah zaa 5-in a rul dawn a. A intiamna a bawhchhiat erawh chuan a \ul anga hma an lak zui an tum thu Money Depositor Group hruaituten an sawi niin thudawnna hian a sawi.
Serchhip police-ten thubuai hi ziak lut lo mah se, DC office-ah erawh hemi chungchang hi report siam a ni thung. Hetiang a nih avang hian a hma lama Jenny Malsawmtluangi dawra bungrua an mante chu pe kirin a dawr an kalhsakte pawh an hawnsak leh vek tawh nia thudawn a ni.
Jenny Malsawmtluangi hnenah hun eng emaw kalta a\ang khan mi \henkhatin a pung tam tak beiseiin pawisa hi an dah \hin a; amaherawh chu, pawisa pung chauh ni lo, an pawisa dahte ngei pawh an lakchhuah theih loh avanga lungawi lovin an pawisa dahnate dawr nia sawi, Serchhip Tuikhuah venga ‘PC Store’ kawtah August 19, 2021 zan khan pawisa dahtu nia insawi te hi pungkhawmin, dawr bungrua te hi lakchhuah tumin an luhchilh a. He thil thleng hi police-ten an hriat veleh PC Store chu pan nghalin, dawr leh kudam khawih chet theih loh turin an hrensak a ni.