Tuirial bialah MNF candidate tling

Tuirial bialah MNF candidate tling

Tuirial bial bye-election a vote tla te chhiar zawh a ni ta a. MNF candidate, kum 49 mi K Laldawngliana’n vote 5820 hmuin, vote 4536 hmua amah hnaihbertu ZPM candidate Laltlanmawia chu vote 1284-in a hneh.
Tuirial bial bye-election a vote tla te hi tukin dar 8 atang khan Govt. Kolasib college-a vote chhiarna tura ruahmanah chhiar ta a ni a. INC candidate Chalrosanga Ralte-in vote 3927 hmuin, BJP candidate K Laldinthara’n vote 249 a hmu bawk.
Tuirial bialah hian vote 17911 awmin, bye-election ah hian vote 14,561 (81.29%) a tla a ni.
Mizoram state assembly inthlan hmasaber February ni 16, 1987-a neihah Tuirial bial hi Kawnpui bial tih a la nih laiin niin, MNF party-in an lo la tawh a. Hemi tum hian vote 9422 awmah vote 7383 tlain, candidate 4 zingah MNF candidate Lalkhawnghinga’n vote 2814 hmuin thlan tlin a ni.
November ni 25, 1998-a assembly inthlanah he bial hi MNF-in la lehin vote 10649 awm atanga vote 8740 tla zingah MNF candidate Sanghmingthanga Pautu-in vote 2819 hmuin thlan tlin a ni tawh bawk a. MLA bial siamrem hnua Tuirial bial a nih hnu ah erawh tuntum hi MNF party-in he bial an lak vawikhatna a ni.

Leave a Reply

Your email address will not be published. Required fields are marked *

error: Content is protected !!