Chief Minister Zoramthanga eirua puhna thubuaia court thutlukna nimina puan tura ruahman chu Nov 8, 2021-ah puan tura sawn a ni a, a \um hnih nan sawn a ni leh ta a ni.
Zoramthanga eirua puhna thubuai hi Court of Special Judge (Prevention of Corruption Act)-in a ngaihtuah a, court chuan thutlukna hi a siam fel tawh a. October 18, 2021 kha court thutlukna puan hun atan ruahmanna hmasa a ni a, Turial bial bye-election neih hmaa court thutlukna puan chu \ha loah ngaiin November 3-a puan turin ruahmanna siam leh a ni a, a \um hnih nan court thutlukna puan hi sawn leh a ni.
Thudawn danin, Court of Special Judge hi a dam loh avangin nimin khan pisa a kai lo a, hemi avang hian court thutlukna puan theih a ni lo a, Nov 8, 2021-ah court thutlukna hi puang turin ruahmanna siam leh a ni.
October 18-a court thutlukna puan a nih loh khan court chuan thutlukna an puan loh chhan sawi fiahin, “Tuirial bial MLA bye-election neih hun a hnaih tawh avangin thutlukna puan hun chu sawn \ha zawka ngaih a ni,” tiin, eirua inpuhna thubuai chungchanga court thutlukna chu peih fel vek a ni tawh tih leh thuremna puan hun hi sawn ni mah se thutlukna hi tihdanglam theih a ni tawh lo tih a tar lang.
Tar lan tawh thin angin, Zoramthanga hi a sum lakluh leh thil neih inmil lo leh Sihphir rama Aii puka a huana sorkar bungrua dik lo taka hmanga puh a ni a, PRISM chuan eiru ngeia ngaiin Anti Corruption Bureau (ACB)-ah thubuai an thehlut a, ACB chuan chhui zui tlakah ngaiin September 15, 2010 khan thubuai a ziak lut a ni.