Sorkar mi leh sa chuan a thawhnate thu a zawm tur a ni
Mizoram sorkar chuan an hnuaia hnathawkten social media leh media hma a an thusawi tur chin leh fimkhur tura an duh thu an chhuah a, ngun taka ngaihtuah chuan kan inthlah zalen rei mah mah tawh niin a lang reng a ni.
Democracy rama awm kan ni a, kan duh duh chu kan sawiin, kan che chhuak thei nameuh mai. Mahse, sorkar hnathawk bikte phei chuan dan zamsa hnuai veka thawk an ni tih hi an intheihnghilh mah mah thin ni hian a lang a, sorkar in thuchhuah an rawn siamsak leh pawh hi a tul reng a, zawm hlawh mawlh bawk teh se.
Sorkar thuchhuaha a lan danin, Media hman chungchanga sorkar hnathawkte inkaihhruainaa a lan danin, sorkar hnathawk tumahin radio leh electronic media kaltlangin emaw, lehkha reng reng ama hmingin emaw, tu hming nge tih hriat loh/awm lovin emaw, hming lem invuahin emaw, mi dang hmingin emaw, a chhuahin emaw, press-ah thawnin emaw, vantlang hmaa puang chhuakin emaw, a ngaihdan emaw, thudik tak sawina pawh ni se, central sorkar emaw, state sorkar emawin policy a neih kal lai emaw, tun hnaivaia a neih emaw, a thil tih (action) a tha lo zawnga nghawng nei thei tura sawichhiatna leh sawiselna lam reng reng a lo sawi ve tur a ni lo, tiin dah a ni a; sorkar hi a ngawi rei zawk ngawtin a lang reng a ni. Nge, thil hrechiang an hnathawkte ka hi hup an tum zawk ni ang?
Kawng lehlama thlir thung erawh chuan sorkar hian eng hi nge a tum ber tih hi hriatthiam a har lek lek thin a, tuna a hnathawkte vaukhanna a han chhuah thar leh pawh hi anmahni mawng hlim an nih theihna lai a awm bawk. Mahse, a tha zawk a chhuah theihna a nih chuan, huaisen takin kal zel phawt teh se.