Kolasib district chhunga dan lova hnam dangin saw-mill an din leh an thingzai ruk motor trip 90 vel man a ni tawh.
Tun hnai khan Kolasib Divisional Forest Officer (DFO) Margaret Lalramchhani hova Kolasib district chhunga dan lova thing zai ruk a awm leh awm loh enfiahnaah, Bairabi-ah hnam dang pakhat, Moni tia hriatin dan lova thing zaina, saw mill a din chu manin an thing zai (teak) motor trip 56 vel leh a thing zaina khawl an mansak.
Moni-a bakah hian Kawnpuiah pawh dan lova din saw mill pakhat leh a thing zai motor trip 20 vel an mansak tawh bawk.
Kolasib district chhung hmun hrang hranga carpentry license neiten dan lova thing la rute thing, zai tura an kawl lai a neitu hriat zui loh pawh trip 20 vel lai mansak an ni tawh bawk.
Heng bakah hian mi hrang hrang ta, phalna nei lova thing zaina hmanrua (chainsaw) pawh \hahnem tak an mansak tawh bawk.
License neite pawh danin a phal loh thil ti tawh lo turin Kolasib DFO hian a zilhhau nghal.
Tun hnaia an thing mante hi marking hammer nei lo leh transit pass pawh nei lo an nih bakah, a ruk a rala tite chu dan bawhchhia an nih avangin man an ngaih \hin thu sawiin, dan zawm hram hram turin mipuite Kolasib DFO hian a chah a ni.
DFO Margareth Lalramchhani hian dan hnuaiah dik taka sorkar phalna nei thlapte tan chuan harsatna an neih loh thu a sawi a. “Sorkar dan zawmin harsatna awm lovin a tih theih a. Dan ang taka thing zaite chu department-in marking hammer pek \hin an ni a. Hetianga permit neite pawhin an saw-mill marking hammer an chhut thlap a ngai a,” a ti.
Kolasib district hi rel station awmna hmun a nih avangin registered transporter eng emaw zatin dan ang takin rel hmangin Mizoram state pawnah thing an thawn chhuak \hin a. Tun dinhmunah hian dan ang taka saw mill neia thing zaina khawl bun hi mi pathum an awm mek a ni.