Maruti Suzuki Celerio thar November 10-ah

auto corner
by Ruata

Maruti Suzuki Celerio thar November 10-ah

Celerio thar tur hi a danglam tawh dawn em em a, a hmaa Celerio chhuak thin aiin a lian hret dawn a, a design lah a mawi zui dawn tho si a. Celerio leitu an pun lehzual te pawh a beiseiawm.

Maruti Suzuki chuan an hatchback zinga mi Celerio chu a design leh thil hrang hrangah a thar hlak tih theih turin new generation model chu tun thla ni 10-ah hian an tlangzarh dawn tih an tichiang ta a. Tunah hian a book theih tawh tih an puang tel bawk.

Maruti Suzuki Celerio thar hi Maruti Suzuki website emaw an Arena dealership-ah Rs. 11,000 chawiin a book theih a. Tawi tea sawi chuan Celerio chhuan hnihna ni tur hi a lirthei an rawn thlak hlawk a tih theih a, Heartect modular platform a hmang ang a, a chhung leh pawn design leh a khawl thlengin a thar vek kan hmu dawn a ni.

An tlangzarh hmaa hriat theih chin?
Sawi tawh angin new generation Celerio hian tuna Wagon R thar te pawhin an hman ang, Maruti modular Heartect platform a hmang dawn a. Heti anih chuan a hmaa Celerio kan hmuh thin ai khan a lian ang a, a sei hret ang a, a sang hret bawk dawn a ni. Celerio thar tur hi dealer thenkhat chuan an la thleng tawh a, a thlalak hrang hrangte pawh internet lamah chuan a darh nasa tawh viau a ni.

A hmaa Celerio kha a mawi em em a, tuna mi hi mawi tak tho siin an rawn tidanglam deuh vek thung a. A hmaa design hriam deuh vak kha a lang mum deuh tawh dawn a. A headlamp te pawh a bial lam a pawl tawh dawn a ni. A man to hoah alloy wheel dum kan hmu ang a, a bumper pawh design thar a ni a, a hmalam bik hi an design kawi nalh viau a, a hnung hi chu a lang mawlmang a, a nalh em em tho a ni.

A chhunglamah thung chuan a dashboard thar kan hmu dawn a. A kentel tur zingah hian 7 inch Maruti SmartPlay Studio Infotainment System chu Celerio-a a vawikhat nan a tel dawn a ni. Heng bakah hian AC vent design thar, centre console thar bakah thil dang dang a awm a. A chhung hi a hma aiin a zau tawh dawn a, a steering wheel leh instrument cluster vel hi Wagon R-a kan hmuh ang a ni dawn a, a switchgear thenkhat S-Presso-a mi ang kan hmu dawn bawk a ni.

A khawl
New Generation Celerio hian Maruti’s K10C engine a hmang dawn a, hei hi Maruti lirthei an tihtawp tak Baleno RS a kan hmuh, naturally aspirated version khawl ang a ni a. Baleno RS kha chuan naturally aspirated ni lovin turbo khawl a hmang a, a power pekchhuah a sang fe thung a ni. Celerio khawl thar hian DualJet technology, cylinder khat zela fuel injector pahnih hmang a nei dawn a. Hei hian a khawlah that zawkna tam tak a nei tih Maruti chuan an sawi a ni. Celerio thar hian idle start/stop system a nei bawk ang a, hei hian tui a ti hek lo lehzual dawn a ni. Maruti Suzuki hian an Celerio thar tur hmang hian thil tum lian tak an nei a, chu chu India rama petrol heh lo ber ‘car’ nih tir an tumna hi a ni. A petrol heh zawng tur an tehna estimate ah chuan petrol litre khatin km 26 a thui a tlan thei dawn a ni.

K10C 1.0 litre three-cylinder naturally aspirated khawl thar a hman tur hian 68hp power a pechhuak thei dawn a, transmission lamah chuan 5-speed manual emaw AMT automatic gearbox emaw duh a thlan theih dawn.

A rawn el tur ho
New-gen Maruti Suzuki Celerio hian Tata Tiago, Hyundai Santro leh Datsun Go tih ho vel a rawn el hmel a. A man tur lam hi sawi chian theih a ni lo a, a hmaa a man ai chuan a to hret rin a ni.

Celerio thar tur hi a danglam tawh dawn em em a, a hmaa Celerio chhuak thin aiin a lian hret dawn a, a design lah a mawi zui dawn tho si a. Celerio leitu an pun lehzual te pawh a beiseiawm viau a ni.

Leave a Reply

Your email address will not be published. Required fields are marked *

error: Content is protected !!