Champion lai Chelsea in tun season UEFA Champions League-ah round of 16 luh an hnaih sawt a, Sweden-ah Malmo tlawhin 1-0 in hnehna an chang.
Eleda Stadion-ah first half-ah mualneitu in an mikhualte hi goal khung lovin an siam a, Blues dan chah an ni fo. Mahse second half-ah Callum Hudson-Odoi ball cross hlauhawm tak atangin minute 56-naah Hakim Ziyech chuan inkhel a goal awmchhun a khung.
Thiago Silva in Chelsea goal hnihna a khung teuh a, goal line atangin Anel Ahmedhodzic chuan a dang hram. Thomas Tuchel-a pawlte hian hnehna an channa kawnga an goal an vendan in fak a phu a, Malmo hian a tir lamah Chelsea ven chu dah pawimawh mahse goal an mamawh hnuah Blues goal-ah hian vawi khat chiah an ‘shoot’ thei a, hei hi Tuchel-a defence khelhthat vang a ni.
Blues hian match li atangin point 9 an hmu tawh a, knockout stage a Juventus zui turin khelh hnih an la hmabak atangin point khat chiah an mamawh tawh.
Chelsea manager Thomas Tuchel chuan, “Result tha neih kan duh a, kan mamawh bawk a, kan tum kan hlen. Goal khung theihna chu kan ngah a, an penalty area bul hnaiah hun kan hmang hnem. Inkhel thununtu zawkah kan tang a, mahse goal luh danah beisei anga thil a kal loh chhan hrang hrang a awm thei. Kan chak avang erawhin hengte hi zaninah kan thlir kher a ngai lo.” tiin an chak hnuah a sawi.
Juve an tling
Juventus chuan khelh hnih la hmabak chungin UEFA Champions League round of 16 an lut chiang tawh a. Argentine striker Paulo Dybala goal hnih khung hmangin 4-2 in Zenit St. Petersburg an hneh.
Group H atang tling turin Juve in point khat bak an mamawh tawh lo tih hre chungin an inkhel a. Dybala hmanga minute 11-naah hma hruaiin minute 26-naah Leonardo Bonucci own goal chu Zenit in an nei ve.
Nimahsela Dybala bawkin penalty atanga a khung belh hnuah Federico Chiesa leh Alvaro Morata ten goal dang an khung a. Juve in buaina an nei lo.
Juve coach Massimiliano Allegri chuan, “A lawmawm lam vek a ni teuh hle, a tawp minute kha erawh hma kan sawn ngaihna a lang leh hle.” a ti.