UCL : Red Devils khuhmawitu Cristiano Ronaldo leh bawk

Manchester United in huntawp dawnah bawk goal an khung a, an mualpho tur hliahkhuh turin point khat Italy atangin an hawn hram a. An goal khungtu pawh Cristiano Ronaldo ni leh thovin Atalanta nen Champions League Group F-ah 2-2 in an inhnehtawk.

Kum 36 mi hian Bergamo a Gewiss Stadium-ah Red Devils si phurh hi tum hnih a sut a. First half stoppage time-ah a goal hmasa zawk a khung a, second half stoppage time-ah a goal hnuhnung a khung.

A ngai te bawkin United
Manchester United in Tottenham Hotspur an hnehna formation an ring a, inhliam Victor Lindelof aiah Eric Bailly bul an tan tir a, midfield-ah Paul Pogba chuan Fred thlakin Edinson Cavani aiah Marcus Rashford an khelhtir.

Mahse an football khel erawh tun season-a tam zawk ang bawkin a mumal lova, Atalanta muallai luahtu Teun Koopmeiners, Remo Freuler leh Mario Pasalic-ten inkhelah hnuhma an ngah zawk thin.

Josip Ilicic chuan minute 12-naah goal hmahruai a khung a. United goalkeeper David de Gea a chesual. Ronaldo hmanga chawlhlawkah beiseina nei thar leh chungin second half-ah an ze ngai bawk United in an chhuah a. Minute 56-naah kheltha tak Duvan Zapata chuan Atalanta goal hnihna a khung leh a ni.

United tan Italy atanga point khat hawn hi thil chhe tak ni lo mahse an inkhel erawhin an fans te ngaihtuahna a ti thui hle ang. Buaina belhchhah turin defender Raphael Varance chu inhliam avangin lakchhuah a ngai bawk.

Manchester United boss Ole Gunnar Solskjaer chuan, “Tuman heng player-te chak duhna hi an sawibo thei lo. Kan beidawng lova, inthlak danglam deuh a ngaih avangin kan insiksawi a, a tawpah a nghawng chu kan hmu mai.” tiin a player-te beidawn duh lohna chu a fak.

Leave a Reply

Your email address will not be published. Required fields are marked *

error: Content is protected !!