Bayern Munich striker Robert Lewandowski chuan UEFA Champions League inkhel vawi 100 a khelh zanah hattrick a siam a. Benfica lakah 5-2 in an team chakpui in knockout stage an hmun German team in an tichiang.
Lewandowski hian first half-ah goal khat a khung a, penalty atangin a khung lo thung. Second half-ah goal hnih khung belhin first half-ah assist vawi khat a nei bawk a. Europe a striker hlauhawm ber a nihna chiang takin a lantir.
Lewan-Goals-ki
Allianz Arena-ah Bayern coach Julian Nagelsmann chuan Covid 19 avanga kar hnih a team te inkhel a vil theih loh hnuah khelmualah a pawlte a ho a. Mahse Benfica in bul tan tha zawkin offside avanga goal pawm loh an nei.
Lewandowski erawh a reh rei lova, minute 26-naah Kingsley Coman-a cross tauh lutin Bayern in hma an hruai. Benfica an insiamthat hma in Lewandowski bawk a che leh a, Serge Gnabry goal khung tur siamsakin Benfica goalkeeper Odisseas Vlachodimos a che hman lo.
Minute 38-naah Brazilian defender Morato chuan Benfica tan goal khat a tauh lut a. Beiseina thar mikhual teamin an nei a, he beiseina ti pung turin Lewandowski hian halftime dawnah penalty a pet goal lo.
Second half-ah erawh German team an danglam hlak a, Leroy Sane-a’n kawh tak mai a goal a khung hnuah Polish striker goalkhung tur a siamsak a. MInute 74-naah Benfica tan striker hmabak nei eng Darwin Nunez-a’n goal khung mahse Lewandowski bawkin inkhel dahtha turin an goal ngana a khung.
Poland striker hian Champions League-ah vawi 100 a inkhelh atangin goal 81 a khung tling tawh a. He inelnaah hian hattrick a siam vawi li-na a ni bawk. Tun season-ah Bayern Munich tan game 18 khelin goal 22 a khung tawh a, Champions League bikah khelh li atang goal 8 a khung leh der tawh.
“Ballon d’Or dawn a phu”
Bayern Munich coach Julian Nagelsmann chuan a striker chu kuminah football chawimawina lian Ballon d’Or dawn a phu tiin a fak a. “Hmanah chuan amah tibuai turin tharum an hmang a, an pet lui a, an nek lui chiam a, mahse a buai phah vak chuang lo aniang, goal a khung reng tho. Tunah a inkhelhdan a thlak deuh a, hei vang hian a hma aiin a hlauhawm lehzual. A hmatawng hriam ber nih a tum tawp a, hei hian danglamna engkim a siam.”
“A goal thun zozai thlirin ani aia phu hi an awm lo. Team tana a thawhna hi a danglam bikna a ni bawk a, khawvela striker tha ber a ni chiang.” tiin fakna tawngkam a uar hle.
Nagelsmann chuan Lewandowski hlauhawm chhan chu an team thawhhona that vang a nih thu a sawi bawk a. “Defender pakhat chauhin kan player tu emaw ber hi a malin a bitum ngawt thei lova, hei hi kan chakna a ni.” a ti bawk.
Coach a awm lo, Ansu Fati a awm
Barcelona chhandam turin an rawlthar beiseina Ansu Fati bawk a inlar leh a. Second half-ah goal mawikhungin Dynamo Kiev lakah 1-0 in an chak.
Kiev Olympic Stadium-ah kum 19 mi Barcelona rawlthar hian a team a chhanhim a. Dynamo defence in Oscar Mingueza ball cross an pet chhuah hleihtheih loh chu remchangah la in penalty area chhung atangin kawh zetin a hem lut.
Ukraine champion lakah Barcelona tan inkhel a awlsam lo hle a. Team pahnihte hian goal khungna remchang an hloh hnem. Nimahsela Fati-a goal avangin Barcelona in tun season-ah inelna hrang hrangah a vawikhatna atan mikhual team ni chungin hnehna an chang.
Barcelona in striker Sergio Aguero dam lohna avangin Fati leh rawlthar dang Gavi te inkhel bul an tan tir a. Spanish international Gavi hi second half-ah French winger Ousmane Dembele chuan a thlak a. Fati leh Dembele te hian Memphis Depay nen an pathumin Barca tlarhma an tinung leh thei tih Kiev-ah hian an lantir.
An mualah Kiev an fakawm a, hnung takah an defence line an rem a, counter-attack rang a innghatin an ti fuh teuh thin a, Viktor Tsygankov-a tlanchakna chu Jordi Alba tibuaitu a ni a, Mykola Shaparenko hriam deuh se goal an khung hmasa ang.
Barcelona caretaker coach Sergi Barjuan chuan, “Engki kawng pawha chak kan mamawh tih kan hria a, hei vang hian a tirah player te pawh an zam. Mahse hnehna chan hian hemi kawngah hian thu tak min pui dawn a, inrintawkna kan nei leh tawh.” a ti.