CS tharin COVID19 chungchang ngaipawimawh hmasa dawn

Mizoram chief secretary thar Dr Renu Sharma-i’n Mizorama COVID19 hri leng mek dinhmun chu India rama state dangte aiin a la tha lo deuh nia sawiin, a ngaihpawimawh hmasak ber tur a nih thu a sawi.

Tunkar Nilainia Health minister Dr R Lalthangliana hova state-level expert committee on COVID19 management thutkhawmah he thu hi Mizoram chief secretary thar chuan a sawi a. Tha tak leh theihtawp chhuah tlanga thawhho a duh thu sawiin, hmasawnna hna dang thawh kawngah pawh sorkar hnathawkte nen thawhona tha tak neih a beisei thu a sawi.

Chief secretary chuan prime minister-in vaccination drive a ngaihpawimawh thu sawiin, “Target group kan neihte hi kumin krismas hma hi chuan thleng kim vek turin tan kan lak a ngai dawn a ni” a ti a. Sorkar hnathawkte chu midangte entawn tur leh zirtirtu tur an ni tih inhre renga an hnate dik tak leh rinawm taka hlen thin turin a chah bawk.

He thutkhawmah hian mahni in lama RAgT sample test kit hmanga lo in test-a positive, a tira inzep, an nat zual tak hnua buaipui ngai an awm thin thu tarlan a ni a, mahnia sample test-a lo positive an awm a nih chuan medical mite emaw LLTF/VLTF hnenah emaw in report zel se an duh thu an sawi.

Symptom nei te a hma thei ang bera hmuhchhuah a pawimawh thu sawilan leh niin, a bikin hritlang leh khawsik neite chu rang taka in test vat zel tura an duh thu an sawi a. Aizawl khawpui hmun hrang hrang 19-ah sample test na ‘kiosk’ dah a nih tawh thu report a ni bawk.

COVID19 kaite a hnua an dinhmun enchiannaah zunthlum, BP sang etc., an nei tih hriatchhuah hnuhnawh an tam thu pawh he thutkhawmah hian sawilan a ni a. Mipui ten anmahni hriselna inchik uluk lehzual se an duh thu an sawi bawk a ni.

Leave a Reply

Your email address will not be published. Required fields are marked *

error: Content is protected !!