Mara students’ organization (MSO)-in nimin khan an din champha vawi 56-na Siaha circuit house-ah an lawm a, MSO dintu, president hmasaber, Mizoram sorkara minister pawh lo ni tawh S Hiato leh president leh hruaitu lo ni tawh dang ten an telpui.
MSO founder president S Hiato chuan kum 1965-ah Shillong-ah Mara students’ organization chu an din tih sawiin, a kum 56-na lawmnaa a tel ve thei chu lawmawm a tih thu a sawi a. Ram leh hnam tana ngaihtuahna seng tur leh zirlai pawl an nih anga zirlai ten hlawhtlinna duhawm zawk an neih theihna tura hma la chhunzawm zel turin a fuih.
S Hiato chuan Mizoramah sorkar hnuaiah hnaa luhna tur a van tawh avangin central service-ah Mara thalaite an luh theih nan theihtawp chhuaha hma la turin MSO chu a fuih bawk.
MSO din champha lawmnaah hian he pawl hruaitu lo ni tawh leh zirlai boral ta te sunna hun an hmang a. Hri leng vanga mipui nawlpui tel theih tura programme huaihawt theih a nih loh avangin hruaitu lo ni tawh te leh sawm bik mi tlemtein he hun hi an hmang a ni.