MSSC sports complex tihchangtlun dan tur thlirho

Sports minister Robert Romawia Royte leh Mizoram state sports council (MSSC) hotu ten nimn khan Republic Venga MSSC sports complex tlawhin, a hmunhma tihchangtlun dan turte an thlirho.

Republic Venga MSSC sports complex-ah hian zanah pawh inkhelh theihna tur volleyball court siamna tur ruahman fel a ni tawh tih sorkar thuchhuah chuan a tarlang a. Cricket zirna hmun tur leh Archery (thalkah) zirna hmun turte chu Republic Veng leh Republic Vengthlang khawtlang hruaitute leh sports association hruaitute, MSSC vice president leh secretary, engineer te leh sports minister te nen a hmunah an sawiho nghal bawk.

Futsal ground hmun tura ruahman pawh enhovin, MSSC ramah a len loh avangin thlanmual ram chu dil belh niin, thuneitu ten ram mamawh zat an pek theih beisei a nih thu sorkar thuchuah chuan a tarlang.

Sports minister chuan Republic Veng MSSC sports complex chu veng bil emaw sports association mal emaw ta bik ni lovin sorkar ta a nih thu a sawi a. Vengtin leh sports association tinte lenna a nih thu sawiin, tha zawka vawn leh enkawl tum a nih thu a sawi bawk.

Leave a Reply

error: Content is protected !!