EDITORIAL 6/11/21


Vawk vulhtute manganna hi engtinnge ni zel dawn?

Vawk pul hri leng vanga vawk vulhtuten harsatna nasa tak an tawh hnuah pawh sorkarin eng tanpuina mah a la pe thei lo a, hetiang lam scheme hran a neih loh thu kan hre thar leh a, tuartute tawrhna hi engtin tak ni zel ang i maw?
Vety minister chuan tunhnai khan ASF leng vanga vawk thi neitute chhawmdawlna tur scheme hran a awm loh thu sawiin, “Chumi avang chuan vawk hri leng hi ‘calamity’-a puang turin DM&R department kan ngen a, ‘calamity’-ah hian puan nise chuan state disaster response fund (SDRF) atangin zangnadawmna inpek theih a ni dawn a; mahse, sorkarin ‘calamity’-ah a puan theih tak loh ah chuan kawng dang ngaihtuah a ngai,” a ti ta thlawt mai a, kawng dang hi engtin tak ngaihtuah zel maw?
Vawk vulhtute harsatna tawh hi kumin kumtir mai kha a ni a, tunah kumtawp kan thleng leh deuh tan der tawh. Vawk thi suat a tam em em a, hri kai thei dinhmuna ding, suat tawhte nen phei chuan tam tham tak a ni ta. Sum leh pai zawnga chhut phei chuan patlingin lungngaia lu a dawm vawng vawng hi a awm tak zet bawk.
Sorkar hian ruahmanna dang a nei lo a nih chuan central lam hi na zawkin nawr se la, tum tak tak chuan theih loh a awm lo, an tih kha maw… Vawk vulhtute harsatna hi en liam a, ngawihbopui vang vang chi a ni tawh lo. Tho chhuak leh tawh lo tur khawpa mangang hi an tam tawh tih hi sorkar hian hre nawn se la, sorkar laipui an ko ei hnai nia an sawi pawh hi thleng dik thuai thuai se tih hi manganga rumte innghahna ni tawh ber e.
“SEDP kan kalpui theih hunah vawk chântute hi duhsak bik an phuin ka hria,” tia minister sawite hi thleng dik chho mawlh bawk teh se.

Leave a Reply

Your email address will not be published. Required fields are marked *

error: Content is protected !!