India chhim lam, Tamil Nadu-a ruah nasa tak sur avanga chhiatna thlengah mi panga vel an thi.
State khawpui, Chennai chu a tuar na ber zinga mi niin mi za tel an chenna in a\angin hmun him zawkah sawn chhuah an ni.
Tun \um ruah sur hi khawpuiin kum 2015 hnu lama ruah a dawn tam leh ber a ni.
Thuneitute chuan ni hnih lo awm leh tur chhung hian ruah tam zawk a sur an la ring a, hmun hniam laia khawsate chu tui lianin a tihbuai an hlau hle.
Tual chhung chanchinbute chuan thing tlu kar leh kawngpuia tui tlingin lirthei a chim laite an tilang nasa hle.
Chennai hi kum tin tun ang hun velah hian ruahin a nuai ziah a, mi thiamte chuan hmasawnna hna thawha ruahmanna mumal awm lo leh khawpuiah ruahmanna a awm \hat tawk loh \hin avangin buaina lian zawk a thlen phah niin an sawi a. Khawvel lum zel avanga sik leh sa inthlakin khaw awm dan uchuak tak tak, ruah sur \euh \euh ang chi a thlen tam dawn niin an sawi bawk.
Power department chuan ruah sur leh tui tling karah electric mante a awm palh loh nan Chennai hmun tam takah power pek an titawp.
Video thehdarhah chuan an chenna ina ti a luh nasat avangin \helret lawngleng hmanga a chengte lak chhuah an nih laite tihlan a ni a. Chhanchhuah hna hi National Disaster Response Force leh sipaite pawhin an thawk a ni.
Thlalak dangah chuan khup thleng thleng tui dai chunga ni tin mamawh lam khawmte pawh an lang a. Khawpui chhunga kawttthler pawimawh deuh chu Inrinni a\ang khan tuiin a chim deuh vek tawh a ni.
Mi tam tak chuan an thil tawn chu kum 2015-a tui lian an tawrh, mi 200 chuangin an thih phahna nen a inan thu social media-ah an tar lang hlawm.
Chennai leh a \henawm district pathumah chuan sikul leh college khar vek a ni a, mipuite pawh \ul bikah lo chuan zin chhuak lo turin an ti a. Sangha mantute pawh tuipuiah la chhuak rih lo turin an ti bawk.
Chennai khawpuia rorel khawl chuan relief centre leh medical camp buatsaihin tui lian tuarte tan ei tur an sem bawk.
Tamil Nadu Chief Minister MK Stalin chuan a minister-te chu chhanchhuah leh chhawmdawl hna thawhnaah theihtawp chhuah turin a ngen bawk.
Chief Minister Stalin hian Thawhlehni khan Chennai-a ruah sur nasain a tihbuai hmun leh tui a tlin nasatna hmunte tlawhin a mamawhtute hnenah ei tur a sem bawk.
Chief minister hi a hmun ngeiah kalin ruah sur nasa avanga harsatna thlengte a en.
Chennai hian kum ruk hnua ruah an dawn tam ber dawngin khawpui laili leh hmar lamah tui a lian nasa hle.
Hetih lai hian India Meteorological Department (IMD) chuan Bay of Bengal chhimchhak lam leh a bul lawka low pressure chuan hmarthlang lam pan zelin Tamil Nadu hmar lam vaukamah Ningani tuk khian khawmual a kai dawn niin an sawi.
IMD chuan, “Darkar 36 lo awm leh tur chhung hian Bay of Bengal chhimchhak leh chhimthlang velah depression a chang a, khawthlang atanga hmarthlang panin Tamil Nadu hmar vaukam hi November 11, 2021 zingah a thleng ang,” an ti.
Thawhlehni zingah khan IMD hian Tamil Nadu-ah hian Thawhlehni atanga Ningani thleng ruah tam tak a sur dawn niin an lo sawi lawk tawh bawk.