Aizawl: Health Minister Dr R Lalthangliana chuan nimin khan Zoram Medical College (ZMC) Academic Department hrang hranga zirtirtute a kawm a, doctor \ha leh rintlak, thiam tak an chherchhuah theih nan theih tawp chhuah turin a chah.
Dr R Lalthangliana chuan, ZMC chu kum thum leka upa ni mah se hma a sawn chak em em a, thil dang zawng aiin thiamna lama thangchhuah an ngaih pawimawh ber a tul tih sawiin, hemi atana mamawhte pawh a theih ang angin an ngaihtuah zel dawn tih a sawi a; zirtirtute chu theih tawp chhuaha an thiamna leh theihnate chu an zirlaite tan sawr chhuak tura tan la zel turin a chah a ni.
ZMC zirtirtute chuan Covid-19 leng dinhmun a ziaawm hret hret zel an beisei thu leh a nih tur anga class kal mumal theih an nghakhlel tih an sawi a, ZMC-a zirlai first batch-te chuan Civil Hospital, Aizawl-ah leh Synod Hospital, Durtlangah clinical posting an neih mek thu leh hei hi an chhawr tangkai takzet tih an sawi a, MZU nen an thawhhona a that thu leh an tangkaipui thu an sawi.
ZMC-a len chhoh zel avangin an hnathawh leh OPD-a damlo inentir an pun zel bakah hmalakna a tam zel tak avangin health management information system changtlung tak an mamawh tawh thute, heng bakah hian department thenkhata thawktu indaih lohna leh mamawh hrang hrangte sawi lan a ni bawk a, intuaihriam zel an mamawh thin avanga India rama medical college changtlung zawkahte a khat tawka training neih thin a pawimawh thu an sawi bawk.
He inkawmhona hunah hian India ram hmun hrang hranga medical college-te dinhmun thlirin ZMC tihchangtlun belh zel dan turte pawh sawiho a ni bawk a ni.