Kum nga chhunga Mizorama cancer natna vei hmuh chhuah zingah chaw kawng, chhul leh hnute cancer vei an tam zual hle.
Population Based Cancer Registry (PBCR)-in an chhinchhiah dan The Zozam Times an hrilh danin, kum 2016-2020 inkar khan cancer vei mipa 4,513 leh hmeichhia 4,157, an vaiin 8,670 an awm.
Mipa 4,513 zingah chaw kawng cancer vei an tam ber a, pumpui cancer, chuap cancer, thin cancer te chu mipaten an vei hluar pawl a ni.
Kum nga chhunga hmeichhe cancer 4,157 zingah chhul leh hnute cancer an tam zual hle a, chuap leh pumpui Cancer te hmeichhe zingah hian a hluar bawk.
Kum 2016 atanga 2020 inkarah cancer natna vei mi 8,670 an awm laiin, hemi kum chhung hian cancer vanga thi 4,642 an awm a. Cancer vei hmuh chhuah tam ber kum chu nikum, 2020 kha niin, cancer vei thar 1,846 an awm a; thih tam ber kum pawh nikum tho kha niin, mi 1087 an thi.
Cancer natna vanga thihna thleng chu kum 2018 thleng khan mi 1,000 chuang an tling ngai lo a, kum 2019 atang khan cancer avanga nunna chân chuan 1,000 a ni ta a ni.
PBCR Principal Investigator Dr Eric Zomawia chuan Mizoram PBCR chu kum 2003 atang khan ‘Indian Council of Medical Research’ hnuaiah Civil Hospital, Aizawlah din a ni a, a tum ber chu Mizorama cancer hluar dan awmze nei taka zirchian leh chu hriatna chu cancer natna do nan leh enkawl nana hman a nih thu a sawi.
Cancer natna veite chu PBCR ah inziah luh ngei tur anih thu leh Mizoram sorkar pawhin notification a tih chhuah tawh thu sawiin, “Damlote chanchin chu khawiah mah pek chhuah a ni ngai lo a, pek chhuah phal a ni lo,” a ti.
Dr Eric Zomawia chuan cancer registry chu cancer vei zat lo chhinchhiahna mai ni lovin, cancer veitu chanchin, a cancer vei chungchangah engtianga enkawl ngai nge a nih tihte, damlo chu eng nge a an zui zel tih thlenga WHO dan zulzui thlapa awmze nei leh fimkhur taka kalpui a nih thu a sawi bawk.