Lunglei-a RT-PCR khawl bun chungchanga court thu zawm lohna thubuai (contempt of court) thu kal zelah Secretary, Health & Family Welfare; Director, Hospital & Medical Education leh Medical Superintendent, Civil Hospital, Lunglei te chu ziaka insawifiah tura court-in a hriattir bakah, mi mal anga court hmaa inlan \heuh turin a ko.
August 4, 2021-a Gauhati High Court, Aizawl Bench-in Lunglei-a RT-PCR khawl bun tura Mizoram sorkar a hriattir hnuah khawl bun mai a la nih loh avanga court thu zawm lohna thubuai chungchang hi nimin khan ngaihtuah leh a ni a. Court chuan R Lalramnghaka, Secretary, Health & Family Welfare; Dr T Lalhmangaihi, Director, Hospital & Medical Education leh SR Ngurchamliana, Medical Superintendent, Civil Hospital, Lunglei te chu vawiin (November 10, 2021) hian ziaka insawifiahna thehlut turin a hriattir a. Hei bakah naktuk (November 11, 2021) chawhma dar 10:30-ah mi mal angin an pathum hian court hmaa inlan \heuh turin a ko bawk.
High court chuan an pathum hi tun thlenga Lunglei-a RT-PCR bun a la nih loh chhan te, RT-PCR khawl bun theihna tura hmanrua mamawh kimchang dapkhawm kim a la nih loh chhan te chu ziaka sawifiah hmasak phawt hnuah, court-a mi mal anga inlan leh turin a hriattir a ni.
Sorkar aiawh lamin high court hmaah RT-PCT laboratory bunna turin building hmunhma thawh zawh a ni tawh a. Hetih lai hian RT-PCR khawl bun thei tura bungraw hrang hrang leh hmanraw mamawh dangte lak khawm fel a la nih loh thu te, RT-PCR khawl bun tura hmanraw mamawh te chu GEM kaltlanga buaipui tur a nih thu te leh, RT-PCR khawl bun tura he’ng hmanraw mamawh te thlang fel a, bun fel tur chuan ni 40 a\anga ni 45 vel tal mamawh a nih thu court a lo hrilh tawh a ni.
PIL No. 1/2021 thubuai kalpui a nih lai khan, State sorkar aiawh lam chuan RT-PCR khawl bun tur hian hmanrua hrang hrang mamawh a nih thu court a lo hrilh tawh.
Tuna court thu zawm lohna thubuai (contempt of court) kal mekah hian Secretary, Health Department chuan RT-PCR khawl bun tura hmanrua leh thawktu mamawh belh a nih dan te chu Medical Superintendent, Civil Hospital, Lunglei hnenah a thlen tawh thu tar lan a ni bawk.
PIL thehluttute aiawha ding JC Lalnunsanga chuan, “Lungleia RT-PCR khawl bun hi sorkar hian chhuanlam hrang hrang hmangin tihkhawtlai dan hi a zawng a ni ber a. Sorkarin ukil a rawihna tura a sum sen zat hian RT-PCR khawl pakhat aia tam pawh hi a bun theih hial tawh a rinawm. Tun \uma sorkar aiawha ding ukil mai pawh ni lo, mimal anga inlan tura High Court-in a koh hi thil thleng zen zen lo a ni, a serious khawp mai,” tiin The Zozam Times a hrilh.
September 8, 2021 khan Gauhati High Court-in Lunglei-a RT-PCR khawl bun tura Mizoram sorkar a lo hriattir tawh chu tihhlawhtlin tumna tak tak nei lo leh bawhzui \ha loah ngaih a nih avangin court thu zawm lohna thubuai (contempt of court) thehlut a ni a. September 14, 2021 khan hemi chungchang hi court chuan ngaihtuahin, R Lalramnghaka, Secretary, Health & Family Welfare, Dr T Lalhmangaihi, Director, Hospital & Medical Education leh SR Ngurchamliana, Medical Superintendent, Civil Hospital, Lunglei te chu chawlhkar li chhunga insawifiah turin a lo hriattir tawh a ni.