Inthlan hmaa tharum thawhna leh eptuten boruak lian tak an siam karah Tripura khawpui, Agartala-a Municipal Corporation (AMC) inthlan lo awm turah bial 334 awmah BJP chuan bial 112 an la tawh a. Tual chhung roreltu (Mizorama local/village council) thlan turah hmun 19-ah thuneihna an chang dawn bawk.
Inthlan hun hi November 25 tur a ni rih a; mahse, hmun eng emaw zatah chuhtu awm lovin state-a rorelna fawng chelhtute hian bial lak an nei nual tawh.
State Election Commission (SEC) thuneitute chuan Thawhlehni khan tual chhung rorel khawl thlan turah BJP hian hmun sarih – Western Tripura-a Jirania, Ranir Bazar, Mohanpur leh Bishalgarh, chhim lama Santir Bazar leh Udaipur leh hmar lama Kamalpur-ah thuneihna an chang tih a chiang tawh tih an sawi.
Seat 222 chuh tur la awmah party hrang hrang – BJP, CPI(M) kaihhruai Left party-te, Trinamool Congress leh Congress a\angin chuhtu mi 785 an awm thu an sawi bawk.
Tual chhung rorel khaw; urban local body 20 hi November 28 hian thlangin mipuiin vote an thlak ang.
Hetih lai hian eptute chuan tharum thawhna thleng vang te, BJP hruaitute leh an \huihhruaiten nasa taka chuhtu turte an vau beh avangtein chuh turin an hming an pe lo va, a pete pawh an inhnuhdawh leh phah niin an sawi ve thung.
BJP chuan heng puhna hi an pha a. Tripura BJP vice president Rajib Bhattacharjee chuan Trinamool Congress chu West Bengal-ah pawh BJP laka firfiak tak an nih angin an tharum thawh \hinna chu Tripura-ah pawh an seng lut niin an sawi.
Trinamool Congress hi Bengal-a rorel lai niin tun hnaiah Tripura-ah inkhuar tumin hma an la a, an hruaitute pawhin an tlawh zing hle.