Union Health Minister Mansukh Mandaviya chuan World Health Organisation (WHO)-in Covid-19 laka invenna tur damdawi a pawm tawh, Emergency Use Listing (EUL)-a a telh pariat zinga pahnih chu India kutchhuak a nih thu a sawi.
Indian siam, Covaxin leh Covishield chu khawvel hual hriselna lam ngaihtuahtu pawl hian hmanhmawh thila hman atan a pawm tawh tlem zingah a tel a. Ram 96 zetin heng vaccine chi hnih hi an hmanpuiin an ringtawk tih Mandaviya chuan a sawi.
November 3 khan WHO hnuaia technical advisory team chuan Bharat Biotech-in an siam, Covaxin hi EUL-a dah tura pawmin kum 18 leh a chung lamte hman atana tih a ni.
“Khawvel pumah India-in vaccine a siam leh invenna pek kan kalpui hi pawm a ni a, ram 96 zetin heng vaccine late hi invenna laah an pawm (Mutual Acceptance of Vaccination Certificate) a ni,” tiin minister chuan a sawi tih news agency ANI chuan a tar lang a. Vaccine chi hnih hmangtute hi CoWIN aap hmangin en vek theih a nih thu a sawi bawk.
Thuchhuah a siamah Mandaviya chuan sorkarin ram hrang hrangte be kual rengin khawvela Covid-19 laka invenna pek lian ber kalpui chu an pawmpui hlawm a. Heng a pawmtu ramte hian a latute an rama lehkha zir tur, sumdawng leh khualpang zin tur pawhin an phalsak hlawm niin a sawi.
India invenna damdawi pawmtu ram 96 zingah khawvel ram lian tak tak, Indian-ten an tlawh leh an awmchilh nasat – United States, United Kingdom, Canada, Germany, Belgium, Ireland, Netherlands, Spain, Bangladesh, Russia, Kuwait, Oman, United Arab Emirates, Maldives leh Brazil te pawh an tel.
Mandaviya chuan hripui leng mek laka invenna hi ram chhungah dose vaibelchhe 109 pek tawh a nih thu a sawi bawk a. “‘Har ghar dastak’ hnuaiah damdawi lama thawkte chuan in tinah invenna pek beihpui hi thlakin an tlawh chhuak vek dawn a ni,” a ti.
Union health ministry chuan Inrinni khan dose vaibelchhe 108 pek a nih tawh thu a sawi a, ni hnih chhungin dose vaibelchhe khat dang pek leh hman a ni.
Ni khata pek zat hi zan rei lamah tihfel thin a nih avangin Thawhlehni zanah kha chuan pung leh hman tura ngaih a nih bawk thu ministry chuan a sawi.
Ministry chuan invenna pek hi Covid-19 kai mai thei leh kai palha nunna derthawng theihte venna hmanraw pawimawh ber a nih rih avangin uluk leh ngun taka thlithlai leh vil reng a nih thu a sawi bawk.
India ramah hian January 16 khan invenna hi pek tan niin a hmasa berah damdawi ina thawkte pek phawt an ni. February 2 atang khan hri leng beihna kawnga a hmatawnga thawkte pek tan veleh an ni bawk.
A thawh thumna chu March 1 khan tan niin kum 60 chung lam zawng zawng leh kum 45 chung lam, natna benvawn neite hnenah pek tan an ni.
April 1 atang khan kum 45 chung lamte tan pek tan veleh a ni.
Sorkar chuan a la theihte huang zauh zelin May 1 khan kum 18 tling chin tawh phawtte lak theih turin a ti zui leh ta a ni.