EDITORIAL 11/11/21

Cancer natnain min nuai na, engtia tih chi nge ni ang?

Mizote hi hriselna lam ngai pawimawh lo tak hnam kan ni hian a lang thin. Natna hrang hrang vei kan tamzia leh kan hriselna lam kan ngaihthahzia hi hnamdangte mak tih a ni hial thin bawk.
HIV/AIDS in nasa takin min run a, kan nun thlahdah vangin kai lo tura kan ngaih em emte thlengin he hri hi an kai a, rin phak bak a ni. Cancer natna lah nise vei kan tam em em a, thihpui phah hial pawh an tam tawh hle.
Population Based Cancer Registry (PBCR) chhinchhiah danin tunhnai kum nga chhunga Mizorama cancer natna vei hmuh chhuah zingah chaw kawng, chhul leh hnute cancer vei an tam zual hle nghe nghe.
Kan ei leh in kan uluk lo a, zuk leh hmuamah kan insum thei hlawm si lote hi a bul chu niin a lang a ni. Heti tak maia Cancer natnain min ngam hi a ngaimawhawm a, hmalak theihna hrang hranga hmalak leh thapui thawha inzirtirna kalpui a hun tawh hle mai.
Chhinchhiah danin kum 2016-2020 inkar khan cancer vei mipa 4,513 leh hmeichhia 4,157, an vaiin 8,670 an awm a. Mipa 4,513 zingah chaw kawng cancer vei an tam ber a, pumpui cancer, chuap cancer, thin cancer te chu mipaten an vei hluar pawl a ni. Kum nga chhunga hmeichhe cancer 4,157 zingah chhul leh hnute cancer an tam zual hle a, chuap leh pumpui Cancer te hmeichhe zingah hian a hluar bawk.
Hetiang hi kan dinhmun a ni a, engtia hmalak zel chi nge tih pawh hriatthiam a har ta hle. Sorkar hian engtinemaw taka inzirtirna leh cancer vei tlemna tura hma a lak nat zual hi a tulin a lang a, chutianga hma kan la thuai thuai lo a nih chuan he hnam hian ral hun a nei mai ang tih a hlauhawm hle. Hriselna lam uar tura kan infuih nat zual a va ngai em.

Leave a Reply

Your email address will not be published. Required fields are marked *

error: Content is protected !!