Naktip hian India ram khawpui hrang hranga mobile e-waste collection van hmanga electronic bungraw hlui hlawn tawh thil dang thar hman tlaka siam thar leh tura lakhawm thintu, Karo Sambhav pawl Aizawlah an inhung dawn.
Karo Sambhav hian hmun hrang hrangah mobile e-waste van hmangin electronic bungrua an hluihlawn tawnte khawn kualin, thil thar dang hman tlakin an siam thar (recycle) leh thin a. Tun tumah hian Mizoram pawh rawn tlawhin, e-waste management lama mipuite kaih harh nan tiin hma lak an tum a. Mizo mipuite tawiawmna an ngen nghal bawk.
November 10, 2021 hian mobile e-waste collection van hmangin Aizawl-a veng thenkhat — Bethlehem, Bethlehem Vengthlang, Tuithiang veng, ITI veng, Republic veng leh Falkland vengte an tlawh kual dawn a. Chawhma dar 10 atang tlai dar 6 chhungin mobile phone, laptop, computer, printer leh electronic bungraw hlui hlawn tawh paih mai tur nei tan pek mai theih an ni dawn a ni.
Hemi ni vek hian Karo Sambhav hian Aizawl bakah India ram khawpui pasarih – Kolkata, Vijayawada, Pune, Shillong, Surat, Jolandhar leh Hyderabad-ah te hetiang hun hi an kalpui dawn a ni.
Global E-waste Monitor, India-in a tar lan danin kum 2019 chhung khan India ram hi khawvela electronic bungrua hlui hlawn/chhia nei tam ber pathumna niin, USA leh China te a dawt a ni.