Aizawl: MNF vice president Lalthlengliana chuan kum 2023 MLA inthlanpui lo awm leh turah Pathianin MNF party chu chawisangin ropui takin a sorkartir leh ngei dawn tih a sawi.
He thu hi nimin MNF party-in Hnam Runa chhung inkhawm an neihnaah a sawi a, MNF sorkarin ram mipui tan hna nasa takin a thawk tih a sawi a, sorkarna an chan hmasak tumin Mautam kumah a thlawnin ration an sem a, hmasawnna ruhrel pawimawh tak tak an siam a, tuna sorkar kal mek pawhin nasa takin ram tan a thawk a, hemi avang hian inthlanpui lo awm leh turah pawh an party-in sorkarna an chang leh ngei dawn tih a sawi.
Lalthlengliana chuan, tuna sorkarna an chan leh hnuah hian mipui ni tin mamawh buhfai, gas leh oil chi tinah harsatna a awm lo a, kawngpui siam hna an thawk mup mup tih sawiin, Covid-19 leng dona kawngah pawh India ramah a ti tha ber state chu Mizoram a ni tiin, “Hei hi sorkarin kohhran leh NGO nen lama a thawhpui thiam vang a ni,” a ti.
MNF Vice president chuan, kalphung thar buaipuite kal dan chu mak a tih thute, kalphung thar tak tak an nei lo a, kelchal tlanchhe ek ang phauh phauh an ni a, an tlem tham lutuka engtikah mah an sorkar dawn lo tih a sawi a, Congress party lah central, state dangah leh Mizoramah an tlasawp tawh em em a, MLA 34 atangin panga chauh an nei tawh tih a sawi.
Lalthlengliana chuan, ram tana ni khat pawh la pen chhuak loten hnam hmangaih ber ang ziazanga an insawi chu zahthlak a tih thu leh heng mite hi Pathianin finna a pek an ni lo tih a sawi a, “Tuna hnam hmangaih ber anga insawite hian London-te khu hnam tan vawi khat pawh an la thleng ve lo a, ram hmangaih intitu tam tak hian Indian constitution chhun han khat pawh an tidanglam ve lo,” a ti.
He hunah hian MNF High Command member pahnih, Padma Shree Award dawngtute – Lalbiakthanga Pachuau leh B Sangkhumi te chawimawina hun hman niin, MNF party hruaituten chawimawina parthi an hlan a ni.