United States chanchinbumi, Danny Fenster-a chu ni thum liam taa Myanmar-a sipai court-in kum 11 lung in tang tura hrem a nih hnu lawkah tan in atanga chhuah a ni.
A thawhna, saptawnga tihchhuah news site, Frontier Myanmar chuan Myanmar hi thlawhnain a chhuahsan nghal tih a sawi.
Junta thupuangtu, Major-Gen Zaw Min Tun pawhin an ram chhuahsan an phalsak tih a sawi chiang ve bawk.
Frontier managing editor Fenster-a hi an rama haw a tum laiin, May thla khan man a ni.
February-a sipaiten thuneihna an chan hnua he rama chanchinbumi leh civil mi sang tel man zinga pakhat a ni.
Fenster-a hi Myanmar rama luhna dan, dan lova pawl siam leh sipai sorkar chhiatna tura chea puh niin thiam loh chantir a ni.
Heng bakah hian kar hmasa mai khan ram do zawng leh firfiaka chea puhna pek belh leh a ni a, heng phei hi chu thiam loh chan chuan dam chhung lung in tan theihna a ni.
Fenster-a chhuah a ni hi US ram palai thin leh mi tangte chhuah an nih theih nana a mantute dawr thin, tuna Myanmar-a awm mek, Bill Richardson-a hmalakna nia ngaih a ni.
Richardson-a hian Fenster-a chu Qatar ram kaltlangin a thlawk haw tih a sawi.
“Vawiin hi hetiang hna i thawh avanga a lo thlen kan beisei reng ni chu a ni,” a ti a. “Hun harsa leh khirh tak tak a tawh hnua a chhungte nena Danny-a an inhmu leh thei tur hi kan lawm hle a ni,” a ti bawk.
Frontier-in an tar lan dan chuan Fenster-a hi sipaiin thuneihna an chan leh nasa taka dotu, Myanmar Now-a thawk thin a ni.
“An puhna hi sipaiten tihchhuah an phal loh, Myanmar Now nena inkaihhnawih thil vek a ni a. Danny-a hi Myanmar Now atang hian July, 2020-ah bângin a hnu thlaah Frontier a zawm a, man a nih lai, May, 2021-ah kha chuan Frontier-ah hian thla kaw chuang a thawk tawh,” an ti.
“Thiam loh an chantirna zawng zawng hi tanchhan engmah nei tak tak lo vek a ni,” an ti bawk.
Thiam loh chantir a nih hma lawk khan US state department pawhin man a ni chu khawvel hmaah a dik lo tih an sawi a. A chhuah theih dan an dap ngei tur a nih thu an sawi.
Myanmar-ah hian sipai hotute chuan an ram inthlanpuiah rorel lai, National League of Democracy chu anmahni thlawp party-te lakah chiang taka an chan hnu lawkah thuneihna an chhuh lui a, an buai phah hle.
Hetianga an tih chhan hi an inthlanah hian vote tihchingpen nasa tak a awm vang niin an sawi a; mahse, an rama inthlan buaipuitute chuan an sawi ang hi finfiahna pakhat mah a awm lo tih an sawi.
Sipaiten thuneihna an chan leh hi mipuiin duh lovin nasa takin ram pumah duh lohna an lantir a, sipaite hian hei hi tharumin nasa takin an chhang let bawk.
Thuneihna an chan leh hnuah hian Assistance Association for Political Prisoners (AAPP) chuan mi 1,260 vel thi tawhin mi 7,251 vel man an ni tawh niin an sawi.
Chanchinbumi pawh 80 vel an thuchhuah avanga man an ni tawh a. AAPP hian an zinga mi 50 vel chu hren mek an la nih thu leh a zahve vel chu hremna pek an ni tawh tih an sawi.