Mizoram Under 25 cricket team chuan Ningani khan Mens Under 25 State A Trophy-ah hnehna an chang a. Run 58 in Sikkim an hneh.
Mizoram hi hmarchhak state dang paruk nen Plate Group-ah an awm a. Guwahati a Nehru Stadium a inkhelah Sikkim in vawm an thlang.
Mizoram tan opener Rohan Chowdhuri chuan run 89 a siam a, middle order batsman F. Vanlalmuanzuala chuan ball 55 atang run 75 a siam bawk a. Over 50 chhungin run 278 an siam.
Tualchhung player hlang a khel Mizoram in an khingpuite run an bituk hnem avangin chak inbeiseina a sang a. Sikkim tan Anwesh chuan run 93 siam mahse over 44.1-ah run 220 siamin an out zova. Mizoram bowler zingah F. Vanlalmuanzuala chuan wicket 4 la in, TC Vanlalremruata’n wicket thum a la.
Mizoram hi khelh hnih atang vawi khat an chakna a ni a, Nilaini khan Arunachal Pradesh lakah an tlawm tawh a. Inrinni hian Assam an an match thumna an khel leh ang.
Mizoram team manager Laithanzuala chuan, “Run 250 kan pelh chuan chak a beiseiawm ah kan ngai a, a tirah wicket hloh nghal mah ila partnership pangngai tak kan nei chho hman zel. Middle-order atangin kan dinhmun kan siam zel thei a, a tawp lam thlengin bat nen kan thawhhlawk. Vawiina kan chak chhan hi kan tanrual vang a ni.” tiin The Zozam Times a hrilh.