Hri leng karah eibar harsa lo, CM sum enkawl thiam vang : Rinsanga


Agriculture Minister C Lalrinsanga chuan Covid-19 avangin central atanga Mizoramin a sum dawn tur tam tak chân mah se mipuiin ei leh barah harsatna an tawk lo a, sorkar hnathawkin hlawh lak tur an la nei zel tih a sawi a, hei hi chief minister sum enkawl thiam vang a nih thu a sawi.
He thu hi nimina Hnam Runa party chhung inkhawm neihah minister, MNF adviser ni bawk, C Lalrinsanga chuan a sawi a, “Hripui leng avangin central sorkar atanga kan hmuh tur cheng vaibelchhe tam tak kan dawng lo chung pawhin ei leh bar, tuialhthei leh kawng dangah harsatna lutuk a awm lo,” a ti a, vawiin thlengin sorkar hnathawkten hlawh lak tur an la nei tih sawiin, a chhan ber chu chief minister zahawm tak, finance minister ni bawkin sum enkawl a thiam vang a nih thu a sawi.
C Lalrinsanga chuan MNF party-in sawiselna satliah mai ni lovin, tihchhiat tuma nasa taka beitu tawk thin mah se ‘Pathian leh kan ram tan’ tia innghat tlat an nih avangin Pathianin an ral a phal lo tih a sawi.
An party-in danglamna bik tak an nei tih sawiin, “Induhthawhna leh thahnemngaihna avangin vuivai deuh kan lo awm thin a nih pawhin a chuanchim zawnga che tumah kan awm lo hi lawmawm ka ti a. MNF hi party dang anga vuan der der tur kan ni lo a, a tlukchhiat lohna tura theihtawp chhuah theuh hi kan tih tur a ni,” a ti.
Agriculture minister chuan lo neituten hlawk zawk leh awmze nei zawka an thlai tharte sum chang thlaia an chantir theih nan Mizoramin Land Leasing Act a nei tawh tih a sawi a, kuthnathawktu, leilet leh tlangram lo neitute pawhin nasa takin hamthatna an nei tawh dawn tih a sawi bawk.

Leave a Reply

Your email address will not be published. Required fields are marked *

error: Content is protected !!