Border Roads Organization (BRO) buatsaih India ram pum fangchhuak tur Motorcyle Expedition-a tel tur te chu nimin khan Mizoram sports minister Robert Romawia Royte-in a vailiam.
India zalen kum 75-na lawmna peng pakhat Motorcyle Expedition hi New Delhi atangin October ni 14, 2021 khan Union defence minister Rajnath Singh’n a vailiam a. Ni 75 chhungin kilometre 20000 chuang BRO hnathawk ‘BRO Karamyogis’ an tih te chuan fanchhuah an tum a. Hemi rual hian BRO-in kum 60 chhunga ram tana an hnathawh te, remna leh muanna atan leh sorkar laipui programme, ram chhunga thilsiam hrang hrang intodelh leh ngaihsan Atma Nirbhar Bharat te mipuite hnenah an puangzar nghal bawk.
BRO huaihawt Motorcycle Expedition hi chawng 7-a then niin, kilometre 7000 chuang an tlan tawh a. Pang, Leh, Kargil, Srinagar, Prayagraj, Varanasi, Nathula Pass, Guwahati, Tezpur, Itanagar, Pasighat, Doomdooma, Jorhat, Dimapur, Imphal te paltlangin Pathianni khan Expedition Team hian Aizawl an lut a, nimin khan Kolkata pan turin Aizawl an chhuahsan leh a ni.
Sports minister Robert Romawia Royte chuan BRO-in Motorcyle Expedtion an huaihawt chu a lawmpui thu sawiin, adventure sports chu Mizo thalaite tuihalna a nih thu sawiin, motor sports tihlar nan Lengpui-ah rural electrification corporation puihnain motor sports complex sak tum a nih thu a sawi a. Mizoramin sports lama hma a sawn dan te sawiin, sorkar laipuiin Fit India movement a tlangzarh hma, thla 5-ah Mizoram sorkarin Fit Mizoram movement a kalpui tawh thu a sawi a. Expedition team te chu an kal zelna turah duhsakna a hlan bawk.