MNF-in Skywalk leh ropeway siamna turah chingpen awma hriain FIR thehlut


MNF party-a Vigilance deptt leh Legal board chuan Swadesh Darshan Scheme II hnuaia Mizoram tourism hmasawnna tura hmalakna hrang hrangah sum tihchingpenna a awm nia an hriat avangin nimin khan Vigilance Department Jt Secretary Lalmuanchhana Sailo hmingin Lok Ayukta-ah FIR an theh lut.
FIR an theh luhah chuan Sakawrhmuituai tlanga sky walk siam tur leh Durtlang atanga Chaltlang inkara ropeway siam turin Mizoram sorkar chuan Restricted Tender hmangin Joint Venture NEIP leh Ropeway & Resorts Pvt. Ltd., Dwarkar, New Delhi-te chu contractor atan a thlang tih an tar lang a. August 30, 2017 khan contractor-te hi work order pek a ni a, hna hi thla 16 chhunga thawk zo tura tih a nih laiin thla 16 ral hnu, December 30, 2018 thleng khan contractor-ten hnathawh mumal an nei lo tih an tar lang.
Contractor-ten hna an thawh mumal loh laiin Mizoram sorkarin sorkar laipui atanga sum an dawn aia tam contractor-te chu sum an pe thung tih an tar lang a, ropeway siam nan Rs nuai 1,241.29 release a nih laiin Rs nuai 1,317.80 pek an ni tih te, skywalk siamna atan sorkar laipuiin Rs nuai 242.50 an release laiin contractor hi Rs nuai 283.50 lai pek an ni tih an tar lang.
Dan ang chuan contractor-te chu Mobilization Advance-ah 10% pek thin a nih laiin hnathawh mumal awm si loa 50% aia tam daih sorkarin a pe chu thil sual lian tak nia an hriat thute FIR an theh luhah hian an tar lang a ni.
Sky walk leh rope way siamna tur sum thahnem tak sorkarin contractor a pe tawh chunga hnathawh mumal a awm loh avang hian central atanga pawisa lo kal leh tur a sukuk phah tih FIR-ah an ziakin, hetiang mipui chanai sum ei rukna nia lang chu chhui chhuahsak tur leh dan bawhchhetute chu dan anga hrem an nih theih nana hma laksak turin Lokayukta chairman an ngen.
Vigilance deptt leh Legal board-in FIR an thehluhah hian Sakawr-hmuituai tlanga sky walk siam tur leh Durtlang atanga Chaltlang inkara ropeway siamna tur chungchanga hmalakna leh sorkar laipui atanga state sorkarin sum a hmuh dan RTI hmanga zawhna an zawh chhanna an theh lut tel a ni.

Leave a Reply

Your email address will not be published. Required fields are marked *

error: Content is protected !!