Nimin khan Rabung khaw bulah lirthei chetsualna rapthlak tak thlengin mi parukin nunna an chân.
Rabung Village Council President (VCP) Lalrova hnen atanga thudawn danin Pathianni zan khan an khuaah mitthi an nei a, mitthi vuinaa kal turin Aiduzawl atangin mi 20 vel Pickup hmangin Rabung khua hi an pan a, Rabung thlen dawn tep, Km 1 velah lirthei hi a tlan liam a, he motor-a chuang mi paruk an thi.
Lirthei chetsualna hmunah hian F.Vanlaldinga (56), Lalsawta (56), Zahliri (57) leh Lalruatkimi (40) Aiduzawl vekte chu an thi nghal a. A hnuah hliam tuar mi pahnih, Zonunsangi (42) leh Lalbuatsaihi (61) an thi ve leh a ni.
Chetsualnaa thite hi Rabung Community Hall-ah lak phawt an ni a, kuangte siam a nih hnuah Aiduzawlah thawn an ni a, vawiinah vui an ni ang.
Pick-Up MZ01H/0883-ah hian mi 20 bawr vel an chuang a, mi parukin nunna an chân a, hliam tuar hi mi 11 awmin, chung zinga mi pakuate chu Aizawl panpui an ni a, an zinga pali chu an ngaihthuahawm deuh nia thudawn a ni.
Mi paruk laiin nunna an chân phahna, lirthei chetsualna chhan tak hi hriat a ni lo a, brake emaw, steering emaw fail a nih an rin thu Rabung VCP chuan a sawi.
Khawzawl district Bawrhsap CC Lalchhuangkima leh thawktu dangten nimin khan Rabung hi an pan nghal a. Rabung Primary Health Centre-a hliam tuar awmte tlawhin Rs. 1,000 theuhin an kan a. Rabung YMA Hall-a accident vanga boralte an dahna pawh tlawhin, mitthi chhungte hnenah ralna pawisa Rs. 3,000 theuh an hlan bawk.
Hemi bakah hian Rabung leh Aiduzawl VC hnenah a tulna apianga hman turin Rs. 5,000 leh silpaulin panga ve ve hlan a ni bawk a ni.
Rabung leh Aiduzawl khuate hi khaw khat anga awm, an inkar hi Km 3-a thui chauh a ni.