Zoram Thar – Zofate Lairelna hruaitute chuan nimin khan Aizawl Press Club-ah chanchinbumite an kawm a, December 16-18, 2021 chhungin Thenzawlah ‘Zofate Haw Runpui/Hnam Inkhawmpui Thianghlim’ neih a ni dawn tih an puang.
Zoram thar hruaitu, Rev Dr Zaichhawna Hlawndo sawi danin, ‘Zofate Haw Runpui/Hnam Inkhawmpui Thianghlim’ hi Zofate Pathian Biak Inpui hmun, Kanan Phaipui, Thenzawlah neih a ni dawn a, inkhawmpui thupui chu ‘I tho vang u khai, I din teh tak ang u’ tih a ni.
Mizoram pawn atanga khual zahawm leh Mizoram chhunga NGO hruaituten thu an sawi dawn a, inkhawmpui tawp niah khawvela Biak In lian ber tur, Zofate Pathian Biak Inpui lungphum phum a ni ang.
He hunah hian Zofate chu thlah khat, bul thuhmun atanga lo chhuak vek an nih nemnghehna lung, Zofate Hnam Lungphun hawn a ni dawn.
Lungphun chungchang Rev Dr Zaichhawna chuan sawifiahin, he lungphunah hian Zohnahthlak chi peng hming zawng zawng a chuang kim vek dawn tih leh hnam chi peng lung hrang hrang chu hnam aiawh khual zahawmten an hawn dawn tih a sawi bawk.