Bulgaria khawthlang lama bus chesuala kang zui taa naupang 12 telin mi 45 vel an thi tih thuneituten an sawi.
An khawpui, Sofia chhimthlang lama kawngpui lianah he chhiatna hi Thawhlehni zing dar 2:00 (India-a zing dar 5:30) pelh hnua thleng a ni.
Bus hi North Macedonia rama mi niin Turkey-a zin khawthawng phurtu a ni.
Mi pasarih dam chhuakin nasa takin an kang a, damdawi inah dah an ni.
Bulgarian interior ministry thuneitu chuan bus hi a kan hnua chesual nge a chetsualna lamah a insawh puak tih hriat mai theih a la ni lo tih a sawi.
Kawng hungna eng emaw zat a chhia a, lirthei dang tel ve engmah a awm lo bawk.
Macedonian Foreign Minister Bujar Osmani chuan bus-a chuangte hi Istanbul-a kartawp hmang, an khawpui, Skopje pana kir leh an nih thu thuthar lakhawmtute a hrilh.
Bulgarian chanchinbu chuan bus dang eng emaw zat nen an inzui a; mahse, an chetsual hma darkar khat emaw lekah hian Sofia bula petrol station-ah an ding muang bik niin an tar lang.
Thite hi tute nge an nih puan a la ni lo va; mahse, naupang leh thalai, kum 20 leh 30 inkar an awm nual tih an sawi.
Macedonian Prime Minister Zoran Zaev chuan Bulgarian television hnenah a tam ber chu Macedonian an nih thu leh Belgian leh Serbian pakhat ve ve an tel thu a sawi.
Zaev-a chuan dam chhuak zinga pakhat biain an muhil vek a, thil puakin a tiharh niin a insawi tih a sawi.
“Mi dang paruk nen hian darthlalang tikehin himin an chhuak a ni,” a ti.
Bulgarian prime minister lailawk, Stefan Yanev chuan chhiatna thleng chu ‘a lungchhiat thlak tak zet’ tiin a sawi.
“He chhiatna atang hian thil kan zir chhuah ka beisei a, hetiang chhiatna rapthlak hi a thlen tawh lohna turin kan invenna tur kan zir ang,” tiin a hmun a tlawhnaa thuthar lakhawmtuten an kawmnaah a sawi.
Chhiatna thlenna hmun, Struma motorway hi Thawhlehni khan khar a ni a. Thlalak thehdarh thenkhatah chuan bus ruang ruh, kang chhe vek tawh hmuh tur a awm.
A hmun a thlen hnuah Bulgarian Interior Minister Boyko Rashkov chuan thite hi an taksa a kang chhe vek tih a sawi tih television station BTV chuan a puang.
Investigative service chief Borislav Sarafov chuan chhiatna thlen chhan hi ‘a khalhtuin a tihsual palh leh khawl lam fel loh vang’ a nih theih thu a sawi.