MZP-in NABARD sum puk hmanga Mizoram hmun hrang hranga sikul building siam thatte an endik mek a, MZP President Lalnunmawia Pautu chuan an chhui chinah pawh thil fel lo a awm ngei tih an hmu chiang tawh tih a sawi.
Nimin khan MZP hruaituten an pisaa chanchinbumite an kawm a, an president Lalnunmawia Pautu chuan, “MZP sub headquaters leh branch ten an huam chhunga sikul building sak thatte an endik mek a, headquater hruaitute pawhin Aizawl leh a chhehvel kan endik dawn,” a ti.
Lalnunmawia Pautu chuan hmun hrang hranga MZP-ten sikul endik a, an chhui chian tawh chinah thil dik lo leh felhlel a awm ngei tih an hmu chiang tawh tih sawiin, “Thil dik lo a awm tih hi kan bengin a hria a, kan mit ngei pawhin a hmu a. Tunah hian endik mek a nih avangin puan chhuah vek erawh a la rem rih lo,” tiin a sawi.
Sikul building thawm that chungchanga thil fel lo awm te a chin chhuaka chhui chhuak a, thil ti dik lo tuin a tawrh ngei theih nan theih tawp an chhuah dawn tih a sawi a, “He thil kan chhui chianna hi a hmawr kan bawk fel hunah chanchinbumite hmaah kan la puang zar ang chu,” a ti.
Mizoram hmun hrang hranga sorkar sikul enkawl building-te siam thatna tur hian NABARD sum Rs nuai 3,500 puk a ni tih MZP President chuan a sawi.
MZP president thar, Lalnunmawia Pautu chuan Mizoram sorkarin post matric tribal scholarship second installment sum pek chhuahna tur order chhuah mah se zirlaite bank account-ah erawh sum hi a la lut lo tih a sawi bawk.
November 24 tlai dar 4 hmaa scholarship sum hi zirlaite account-ah a la lut loh a nih chuan chief minister office kawtah lungawi lohna lantir an tum thu a sawi.
MZP president chuan, MZP hruaitu tharten hmachhawp tam tak an neih thu sawiin, zirlai pawl an nih angin zirlaite hmakhua an ngai pawimawh ber dawn tihte, ramri humhimna kawngah pawh theih tawp an chhuah tur thu leh Chakma foreigner te Mizorama an rawn luh zel loh nana hma la turin Chakma Autonomous District Council (CADC) huam chhung khaw hrang hrang fan kual an tum thute a sawi bawk.