Covid-19: Germany an buai


German health minister chuan an ram mipuite chu Covid-19 hripuiin a nuai thar leh mekah vaukhanin, ‘inven, enkawl nge thih’ tih chu tun thlasik a tawpah chuan duhthlan tur pathum an neih a nih dawn thu a sawi.
Europe ram tam takah hri an inkai darh leh nasat tawh avangin inkhuahkhirhna an kalpui thar leh mek hlawm.
“Tun thlasik a liam hi chuan, dik taka sawi hi chuan Germany-a mi tin hi invenna la tawh, enkawl dam tawh leh thi an ni dawn,” tiin Jens Spahn chuan a sawi a. German-te chu invenna la thuai thuai turin a ngen.
Germany-ah hian a len nasat zualnaah chuan damdawi ina intensive care a khat zung zung a, inkharkhip puan thar a ni a, Krismas bazar pawh an khar hlawm.
Damdawi in awm an tam zualna hmunah chuan invenna la la ve lote chu vantlang pun khawm theihna – ennawm chhuahna, gym leh thingpui dawrah te an luh ve phalsak an ni lo.
Chancellor kal chhuak tur, Angela Merkel chuan tuna inkhuahkhirhna an kalpui, invenna la lote mi tamnaa awm phal loh tih ngawt chu a tawk zo lo tih a sawi.
“Kan inkai pun chak dan hi a rapthlak a, ni 12 zelah a letin kan pung,” tiin Merkel-i hian an party, CDU hruaitute nen an inkawmnaah a sawi tih a tel vete chuan an sawi.
European Union-a mihring tam berna, Germany-ah hian Thawhtanni khan hri kai mi 30,643 hmuh leh hman a nih thu Robert Koch Institute health agency chuan a sawi a, mi maktaduai 5.3 chuangin an kai tawh.
Mi 1,00,000 dawnin thihpui tawhin darkar 24 liam ta chhungin mi 62 an th leh hman a. “Damdawi in tam tak chu an buai dan a namenlo hle a ni,” Spahn chuan a sawi.

Austria-ah inkharkhip
Austria pawh ram pum inkharkhip an kalpui leh ta a, coronavirus inkai darhna nasa tak a thleng a, an buai hle.
Alpine ramah hian Thawhtanni atang khan inkharkhip hi an kalpui tan a, tun hnaiah ni khata thi hi a let thumin an pung a, damdawi in intensive care unit chu a khat rang thei hle.
Inkharkhip hi ni 10 chhung kalpui turin an ti phawt a; mahse, ni 20 thleng pawh sei theih a ni dawn tih thuneitute chuan an sawi a. Austria hi invenna siam chhuah a nih hnuah Europe khawthlang lam ramah chuan inkharkhip puang leh hmasa ber an ni.
Inkharkhip hnuaiah hian mipuite chu chhan tha tawk tak – ni tin mamawh lam, doctor hmu tur leh exercise la tur tih loh chuan chhuah phalsak an ni lo.
Ni tin mamawh zuar tih loh dawr dang inkhartir niin hna pawh a theih chen chen in atanga thawk tura tih an ni.
Austria-ah hian mihring maktaduai 8.9 vel cheng zinga 66% emaw vel chauhvin invenna bikim an la la a, Europe khawthlang ram zinga la hniam ber an ni.
Inkharkhip an kalpui thar leh rual hian February 1 atang hi chuan invenna lak chu dan angin an kalpui dawn a, Europe ram zinga dan (legally) anga kalpui hmasa ber tur an ni ang.
An kalpui dan tur tak puan chian la awm lo mah se sorkar chuan a la lote chu chawitir an ni dawn tih a sawi.
Austrian Chancellor Alexander Schallenberg chuan invenna la tawh mipuite pawh loh theih lohva kharkhip an ni ve chu ngaihdam a dil.
Austria-ah hian invenna la lote kharkhip phawt an ni a, inkai a hniam chuan loh avangin ram pumah an kalpui zui ta a ni.
Zirtawpni khan mi 15,809 zet kai hmuh niin ni khata an tam ber tum a ni.
Europe ram dang, hri kai pun chaknate chuan Austria dinhmun hi an ngaichang thup a, awmzia a awm chuan inkharkhip kalpui ve mai turin an inring hlawm niin Al Jazeera chuan a tar lang.

Inkhuahkhirh duh lotute tal nâ
Europe-a ram hrang hrangin hri kai an pun chak leh avanga inkhuahkhirhna an kalpui chu mi tam takin duh lovin hmun tam taka buaina pawh a chhuak.
Inrinni khan Austra khawpui, Vienna-ah mi 40,000 zet an pung khawm niin police chuan an sawi a, an zingah hian far-right party mite pawh an tel.
Austrian tam tak chuan inkhuahkhirhna kalpui thar leh invenna lak ngei ngei tur chu an tan ‘phurrit’ a tling niin an sawi hlawm.
Kartawp liam taah khan Belgium, Croatia, Italy, Netherlands leh Switzerland-ah te chuan inkhuahkhirh duh lohna lantir a ni hlawm.
Dutch Prime Minister Mark Rutte chuan zan thum zet an buaina chu ‘mi mawlin tharum an thawhna’ tiin a sawi a. Belgian Prime Minister Alexander de Croo chuan mi 35,000 zet tharum nena an che chu ‘pawmzam chi loh’ a ti ve bawk.
World Health Organization chuan tun thla tir lam khan Europe khawmualpui chu hripui lenna hmunpui a nih leh mek tawh thu sawiin, chet lak thuai a nih loh chuan February thla tawpah chuan mi 5,00,000 chuangin an thihpui leh hman dawn niin a sawi.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427