MLA hlui, Mizoram sorkar hnuaia Industrial Development Board-a vice chairman ni lai, C.Ramhluna (74) chu Thawhtanni zan khan a thi a, nimin khan vuiliam a ni.
C Ramhluna hi Thawhtanni zan dar 8:40 khan Ebenezer Medical Center, Aizawl h natna hrang hrang vangin a thi a, nimin chawhma dar 11 khan BCM City Church Hall I-ah a thlahna hun hman a ni a, chhun dar 12-ah BCM City Church Biak In, Bungkawn, Aizawlah Rev.H.Lengluta’n a vui a ni.
Environment & Forest Department-a hotu lu ber, Principal Chief Conservator of Forests(PCCF) hna chelh lo chelh tawh thin, C Ramhluna hi sorkar hna atanga a pension hnu kum 2008 Mizoram MLA inthlanah khan MNF party atangin Lawngtlai West constituency-ah thlan tlin a ni a, tun sorkar kal mekah hian SEDP Industrial Development Board-ah vice chairman a ni.
MNF Party chuan an ddviser ni mek, C.Ramhluna an ui thu thuchhuah siamin an tar lang a, a nupui fanau, tu leh fate zawng zawng Pathianin thlamuan a awmpui zel turin an duhsak takzet tih an tar lang.