Ramri buaina: State pahnih CM-ten boruak tha siam chunga inbiak ni se ti


Ramri chungchangah Mizoram leh Assam chief minister inkawmin boruak tha thei ang ber siam chungin state pahnihte inbiak thin se an ti.
Nimina Union Home Minister Amit Shah hova state pahnih chief minister, Zoramthanga leh Himanta Biswa Sarma?ten ramri chungchangah an inkawm a. Mizoram leh Assam ramri buainaah dawhkan khat kila harsatna leh buaina telloa sawi fel ngei ni se tih a ni a. Chief minister level-ah a ni emaw, state pahnihten delegation team insiam ve ve emaw pawhin boruak tha thei ang ber siamin inbiakna neih thin nise an ti a ni.
Union home minister hova inkawmna neih a nih hma, Ningani khan New Delhi-a Assam House-ah Assam leh Mizoram chief minister-ten zanriah kil dunin an lo inkawm tawh a. Hetan hian tun hnaia Hachhek tlangdunga kuhva chingtuten Assam lama a hralhna kawnga harsatna an tawh dante sawi a ni.
Chief Minister Zoramthanga hian Hachhek tlang dunga kuhva hring thar chhuah Assam lama hralhna kawngah, Patharkandi district bial thuneitu thenkhatin Myanmar atanga kuhva lo lut nia an ngaih avanga kuhva chinga eizawng Mizo tam takin kuhva hralhnaah harsatna an tawh nasat thu a sawi a. Assam Chief Minister Sarma chu kuhva hring thar an lo hnarsak thin chu titawp thuai turin a sawipui a ni.
He inkawmnaah hian Assam chief minister hi Assam Agriculture & Veterinary Minister Atul Bora chuan tawiawmin; Chief Minister Zoramthanga hi Rosangzuala, OSD to CM, Delhi Mizoram House Resident Commissioner Amjad Tak leh official dangten an tawiawm thung.
Nimin khan Chief Minister Zoramthanga hian Dr. T. V. Somanathan, Finance Secretary, Ministry of Finance kawm lehin, Mizoram hmasawnna atan mamawh hrang hrang a sawipui bawk.

Leave a Reply

Your email address will not be published. Required fields are marked *

error: Content is protected !!