India rama badminton zirna academy tha bera ngaih, Hyderabad a Pullela Gopichand Badminton Academy a coaching kal turin Mizo naupang pasarih thlan an ni.
TATA Trusts hmalakna hnuaiah he academy a kal thei tur zawnna trial nei turin Mizo naupangte tirh an ni a. Trial tura kal hmasa zawkte atangin pasarih an tling.
Tling te hi ‘full sponsorship’ a coaching kal tur an ni a, academy-ah hian awm chhunzawmin badminton an zir ang. Heng naupangte hi Raipur a ITM University Badminton Academy a zir thei tur thlanchhuah tawh zing amite an ni hlawm.
Gopichand Academy a zir turte hian hostel awm man, ei leh in man leh national tournament a an khelh na tur senso nen lam engmah an chawi a ngai dawn lo a. TATA Trust lam in an tum sak vek dawn tih RDC Coach Albert Lalnunhlima chuan a sawi.
Vawiin hian Gopichand Academy a trial nei tur batch hnuhnung zawkten Mizoram an chhuahsan ve bawk ang.
Mizoram Badminton Association chuan chuan naupang tlingte hi a chhuang a, an hmalam hunah hlawhtlinna sang zawk an neih ngeina turin duhsakna a hlan thu an sawi ve bawk.
Coach lamah
Gopichand Academy-ah hian Eddie Lalfelkima, Dinthar Veng chu coach ni tura thlan a ni a. TATA Trusts leh MBA thawhhona hnuaia Regional Development Center, Ramhlun Indoor Stadium coach ni lai Eddie hi Gopichand Academy a trial nei turte hruaitute zing ami a ni.
Hetihlai hian Ponty Lalramtluangi, Zotlang chu ITM University Badminton Academya Mizo naupang awm turte enkawl zui tura coach atana thlan a ni nghal bawk. Ani pawh hi RDC, Ramhlun Indoort Stadium a coach ni lai tho a ni bawk.
Gopichand Academy a tlingte :
- Malsawmzuala Kum 14 Serchhip
- C. Lalramsanga Kum 14 Durtlang
- Malsawmhlua Kum 11 Serchhip
- H. Lalrinhlui Kum 12 Chanmari West
- Zosangpuia Kum 12 Sihphir
- Joseph VL Ringngheta Kum 18 Kulikawn
- H. Lalthazuala Kum 14 Chanmari West