NT Lalbiakkima a chak awlsam

IBA Intercontinental champion nih inchuhin Inrinni zanah Mizo boxer NT Lalbiakkima leh Thailand boxer Gerttipong Kumsahwat ten hruihrual chhung an lut a. Mizo boxer Biakkima hmaah a khingpui hian round hnih a daih zo lo.

Dawrpui Multipurpose Hall a LPS Fight Night 2-ah hian main event-ah bout nghahhlelh a thleng a. Biakkima a chungnung hle a, nghahhlelh man awm lo lek lek khawpin a khingpui a ngam.

Round khatna tan a nih chiah atangin a khingpui hi chiang takin a dingin a hnek fuh a, ding leh vei ‘combination’ hmangin a hnek chhuak zui hnem. Kumsahwat-a invenna kara hneh luh a nei nual a, a taksa lamah a nakah a hnek fuh thin bawk.

Thai boxer hian Biakkima nawrna karah vai fuh let nei ve zauh hman mahse a khingpuiin thaza taka a nawr chu tihngaihna a hre lo. Round tawp lamah Biakkima hian chiang taka hnek fuhin Kumsahwat lu a hai.

Round hnihnaah pawh thil a danglam lo. Biakkima’n a ‘tempo’ ngai in a khingpui a hnek chhunzawm a, Thai boxer a ding reng thei tawh lo. Minute khat leh a chanve vel hnuah a lu a hai a, referee in inhnek a titawp. Technical knockout in NT Lalbiakkima a chak a, a champion kawnghren a humhim.

A chak hnuah Biakkima chuan, “A hmasa berin Pathian hnenah lawmthu ka sawi a. Ka manager Devraj Das hnenah pawh lawmthu ka sawi. Ka hma hunah title dang pawh lak belh zel turin ka inpeih.” tiin a sawi.

A lang lo lam
LPS Fight Night 2 ah Mizo boxer pasarih inlan atangin paruk an chak a. Main event bik erawhin beisei a pha lo. Organiser LPS hotupa Lalsawmliana Pachuau chuan, “Kan main event kha, a hnu lama kan hriat thawi lehah Covid vei, damna la rei lo ang khan an sawi a, amaherawhchu khang ang zep deuha helaia fight tura an lo kal kha a lungawithlak loh ka tia, khalai kha duhthusam lo lai chu a ni.”

“Kan referee kha amateur boxing atanga professional lama a luhna a la rei lo deuh nge, duhthu a sam lova. A fimkhur lutuk vang nge, bout tawp danahte duhthu sam zan lo lai chu a awm. Pakhatah erawh boxer khan a hnenah a khelh zawm tawh loh tur thu a hrilh.” tiin The Zozam Times a hrilh.
“A bakah chuan Mizo boxer-te fight a tha a, kan quality a sang tih a hmuh theih.” a ti bawk.

Hetihlai hian pay per view an hralh dan erawh sawi theih a la nih loh thu a sawi a. “Kan beisei a san tawh laiin tum dang ang thovin fight neih dawn a PPV lei tum an tam a, kan peak lai a lo ni leh a. Tah khan a ruala Mizoram hmun hrang hranga han dah luh tum kha kan khawl lamah harsatna a awm phah ta thin a. Kha khan lo lut tur a nghawng ve ang.” tiin The Zozam Times zawhna a chhang.

Undercard a hmuhnawm
Main Event hma in Mizo boxer paruk in khingpui an hmachhawn a, boxing bout hmuhnawm tak tak en tur a awm.
Che tha zingah C. Lalhruaitluanga’n super welterweight-ah tawnhriat neitha Kamal Kant chu technical knockout in a hneh a. Hruaia tan hnehna pawimawh a ni.

India boxer tha Kant-a’n a khingpui a zuam sual a, fitness-ah an inthlauh bakah amateur boxing a kum naupangte a hnuhma nei tha Hruaia’n a thiamna a chakpui.

Super lightweight-ah Vanlalawmpuia’n Suresh Pasham a hneh a. OP-a hian a khingpui hi knockout tumin a nawr na a, a hnek hnem chungin a khingpui a tlo.

Suresh-a’n OP-a nawrna karah hnek fuhin Mizo boxer a tlu a, mahse a fitness that avangin a tawpah hnehna a chang tho.

Featherweight-ah Laldingliana’n Rohit Mehra a hneh a, HC Lalramfela’n Parash Chauhan chu technical knockout bawkin a hneh a. H. Lalrinhlua chu split decision in a chak bawk.

F. Zoramchhana erawh a khingpui, professional huanga vawi li chak tawh, India a amateur boxing a experience ngah tawh tak Sandeep Singh Bhatti lakah split decision in a tlawm thung a. Zotea hi khelchhe lo mahse ani aia tawnhriat ngah Sandeep-a’n round hnihna hnu lam atang a insiamrem theih chu a chan a that phah a, point hmangin a chak.

Undercard a boxer panga inlante hi Sete Boxing Academy hnuaia mite an ni a. Coach Sete Lalchhuanawma chuan, “Kan inbuatsaihna chu a tha a, mahse professional huangah bul kan tan chauh a, kan tawnhriat la neih tlem avangin kan inbuatsaihna ang tak takin kan la khel lo. Kan boxer-ten hnehna chang a, tumah khelchhia an awm lo. An kheltha vek a, mahse kan training te ngaihtuah chuan kha aia sang daih theihna kha an la lantir thei.” tiin Mizo boxer-te theihna a sang tih a sawifiah.

Leave a Reply

error: Content is protected !!