Manchester United chuan Ralf Rangnick chu tun season tawp thlenga an interim manager ni turin an ruat a, visa a tihfel veleh a club thar hi a enkawl nghal ang.
Kum 63 mi hian November 21 a ban tak Ole Gunnar Solskjaer hmunruak a luah dawn a. Russian club Lokomotiv Moscow a head of sports & development nihna a chelhlai chu a chhuahsan.
“Manchester United season siamtha tura club ka zawm thei hi ka phur hle a. He squad hi talent nei tha tak niin player naupang leh tawnhriat inchawhpawlhna tha tak a ni.”
“Tun thla ruk chhung hian heng player-te hi an theihna chu a tak a chantir turin ka theihtawp ka hlan dawn a, mimal leh a pawimawh ber, team angin an theihna ka phawkchhuak ang. A bakah chuan he club hi hun rei zawka a kal zel dan tur ngaihtuahtute zingah ka tel dawn a, hei pawh hi a chakawm tawh hle.” tiin a sawi.
Rangnick hian tun season zawhah hian Old Trafford-ah hian kum hnih dang a cham dawn a, hetah hi chuan club hotu lam in inrelbawlna an kalpui dana thurawn petu a ni tawh thung ang.
A work permit hi tihfel a nih hman chuan Ningani zanah Arsenal a enkawl hman dawn a, a nih loh erawh chuan caretaker manager ni lai Michael Carrick bawkin Gunners a hmachhawn ang.
United football director John Murtough chuan, “Ralf hi European football a coach zahkai leh thil thar kalpui thin a ni a. Interim manager ni tura kan duh ber a ni. Thiamna bakah hmahruaitu nihna tha tak a nei a, coaching leh inrelbawlna lamah kum 40 dawn tawnhriat a nei tawh.”
“Kan zavaiin ani thawhpui hi kan chak tawh a, a hnu lamah pawh kan thawhhona hi a la kal zel dawn a ni.” tiin a sawi ve bawk.