Minute li chhungin farm law pathum hnuk kir!


Lo neituten kum khat chuang an duh lohna an lantir hman, farm law an tih pathumte chu Thawhtannia parliament thlasik thutkhawm tan niah sorkarin a lo sawi lawk tawh angin minute li chhung lekin hnuh kir a ni.
Farm Laws Repeal bill hi Lok Sabha-ah chuan minute li lek chhungin, chhun dar 12:06-a pharh chu dar 12:10-ah sawiho miah lova hnawl nghal a ni.
Rajya Sabha-ah erawh chuan reilo te sawiho a ni a. Congress hruaitu, Mallikarjun Kharge chuan party tinin hnawlna hi an thlawp a, tumahin an duh lo lo niin a sawi.
Lok Sabha-ah thung hian sawihona engmah a awm lo chu eptute an lawm vak lo va, dan siam hnawl lehna tur bill lo put luh tawh tum nga tum ruk velah pawh sawihona a awm ziah niin an sawi.
“Modi I (2014-19) khan Repealing & Amending Bill 2017-ah pawh MP parukin an sawi a, hei hi mipui rorelna kalhmang a ni. II (2019-vawiin)-ah erawh Farm Laws Repeal Bill 2021 chu pass a ni a, sawihona a awm lo va, mipui rorelna lam engmah a awm lo,” tiin Trinamool Congress hruaitu, Derek O’Brien chuan Twitter-ah a tar lang.
Eptute hian sorkarin lo neitute an phut, minimum support price chungchang sawi an hlauh avangin hetiang hian a palzam ta niin an puh.
Rorelna in hniam zawk, Lok Sabha-ah hian Thawhtanni chawhmaa inkhawm tan deuh chiah atangin eptute chuan rorel kaltluang an tibuai nghal.
Prime Minister Narendra Modi chuan a sorkar chuan eptute zawhna leh hriat duh zawng zawng chhang vek turin an inpeih tih a sawi a. “Sorkar leh sorkar policy dodalna lam thil au chhuahpui an awm chuan parliament leh speaker thutnain kenkawh a ni ang,” a ti.
Vawi 18 thukhawm la hmabakah sorkar chuan legislative bill 30 leh finance bill pakhat pharh hmabak a la nei.
Bill pharh tur zingah hian Cryptocurrency & Regulation of Official Digital Currency Bill, Insolvency & Bankruptcy (Second Amendment) Bill, 2021 leh Electricity (Amendment) Bill te pawh a tel.
Parliament thlasik thutkhawm hi rorel tluang taka neih a nih theih nan Pathianni khan party tin aiawh intawh khawm koh niin prime minister a tel lo va. Hei hi eptute chuan tih dan phung pangngai bawhpelhna niin an sawi.
Parliamentary Affairs Minister Pralhad Joshi erawh chuan chhanin, “All-party meet-ah prime minister tel tur tih hi tih dan phung a ni lo va, Pu Modi-a bul tan zawk a ni,” a ti ve thung.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427