NGT-in thiah tura a tih Chalhfilh tlanga in sak atangin thil bo nasa


National Green Tribunal-in Chalfilh tlanga in sakte thla khat chhunga thiat tura tourism department a hriattir hnuah Chalfilh tlang Tourist Lodge-a tuizem (sintex) bakah granite phah leh thil dang a bo avangin Khanpui khawtlangin Chalfilh tlang zawl chu lirtheia tlawh theih loh turin an dang.
Khanpui YMA hruaituten The Zozam Times an hrilh danin National Green Tribunal-in Chalfilh tlanga in sakte thla khat chhunga thiat tura tourism department a hriattir hnuah he tlanga bungraw awm thenkhat chu a bo nual a. Tuizemte bakah granite phahte pawh khawh niin, ceiling fan-te pawh a bo a. Bungraw dangte a bo zel loh nan tlang zawl chu lirtheia luh theih loh turin khawtlangin an dang a ni.
Chalfilh tlanga bungraw hrang hrang la botu chu an hriat loh thu Khanpui YMA hruaitute chuan an sawi a. Khawtual mi chu an nih loh thu sawiin, tute nge an nih leh eng hun laia lo phur chhuak nge an nih pawh an hriat loh thu an sawi.
Tun thla ni 22 zana Khanpui VC kaihhruaia tlawmngai pawl hrang hrang thukhawm chuan National Green Tribunal thupek chu an duh loh thu an lo sawi tawh a. Chalfilh tlanga tourism department-in in a sak te chu thiah kher tul an ti lo.
Chalhfilh tlanga building sakna hmun chu phul hmun vek a nih thu leh thing leh mau tihchhiat a awm loh thu Khanpui khawtlang chuan an sawi a. “He building thiah hian tuihna a tihpun belha, ngaw a siam belh dawn loh avangin thiah kher a tulna kan hre lo,” an ti.
Khanpui khawtlang chuan department, society, NGO leh a dang ten project chi hrang hrang hmangin Chalfilh tlang chu sum siam nan an hmang thin tih sawiin, “Hei hi ramngaw tichhiaa tichereutu ber pakhat a ni,” an ti a. Chalfilh tlang chu department, society, NGO leh a dangten sum siamna atan hmanga hma la tawh lo tura an duh zawk thu an sawi bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427