Chakma pawlten dan lova Bangladesh atanga Chakma lut donaah MZP thlawp


Bangladesh atanga Mizorama dan lova Chakma lutte do kawngah CADC huam chhunga Chakma pawl hrang hrang hruaituten MZP an thlawp thu an sawi.
Borapansuri khuaa Zofate Chawlhbuk-ah nimin khan MZP hruaitute leh CADC huam chhunga Chakma pawl hrang hrang hruaitute an inkawm a. MZP President Lalnunmawia Pautu-in Bangladesh atanga dan lova Mizorama lut ru Chakmate do kawnga Chakma pawl hrang hrangte thawhhopuia a sawmna chu an pawm thu leh MZP an thlawp thu an sawi a ni.
Young Chakma association (YCA), Borapansury Zone President Santosh Chakma chuan dan lova pem lut, Bangladeshi rilru pute chu an mamawh loh thu sawiin, “Foreigner hi kan duh lo, kan tan buaina an ni a, keini chuan MZP kan thlawp tlat,” a ti.
Borapansury-I East VCP Dal Kumar Chakma pawhin Bangladesh atanga dan lova lutte chu an tan buaina lian tak thlentu an nih theih thu sawiin, theihtawpa an do tur thu a sawi.
Zonal YCA Secretary Daniel Chakma pawhin CADC huam chhunga YCA leh NGO hrang hrangten dan lova pem lutte an pawm loh thu sawiin, “Kan tan buaina an rawn thlen a, keini chuan MZP hmalak mekna hi a tawp thlengin kan thlawp ang,” a ti bawk.
MZP president chuan Chakma hrim hrim an huat loh thu sawiin, dan lova pem lut, 1950 hnu lama duh duha pem luta, dik lo taka ram leilung fate chanai chuhpuitute chu an huat ber a nih thu a sawi.
“Dan anga Mizorama awm, 1950 hma lama Mizorama awm tawh Chakmate hi dan lova lo pem lutte leh luh tum mekte dang tura thawhhopuiah kan sawm che u a ni,” a ti a. Mizo laka buaina an siam erawh chuan MZP laka buaina siam an nih tur thu a sawi.
CADC huam chhunga Chakma pawl hrang hrang leh MZP chuan Borapansury leh a chhehvela dan lova foreigner luh tumte do kawnga thawhho an remti tlang a ni.

Leave a Reply

Your email address will not be published. Required fields are marked *

error: Content is protected !!