Mizoramah HIV hri pai mi 21,786 awm mek


Mizoramah HIV hrik pai mi 21,786 awm mek anga chhinchhiah a ni a, HIV laka fihlimna tura condom sem thin chu Mizorama kohhranten an hrethiam tan.
Nimin AIDS dona ni, World AIDS Day pualin HIV/AIDS dona kawnga Mizoram State AIDS Control Society (MASCS)-in an thawhpui, AIDS Healthcare Foundation (AHF) hotuten Hotel Floria-ah chanchinbumite an kawm a, Country Program Director Dr V Sam Prasad chuan condom sem chu Kohhran hruaituten an hriatthiam tan thu a sawi.
Dr Prasad chuan kum 2018 atang Mizoramah condom semin hma an la tan tih a sawi a, “Bul kan rawn tan tirhah chuan kohhranin an duh lo hle a, kohhran hruaitu hrang hrangte kan hmuh hnuah erawh kan thil tum hi an hretthiam tawh,” a ti.
Khawvel tibuai mektu, Covid-19 leng avangin HIV/AIDS dona kawnga an hmalakna a khaihlak nasa hle tih AHF country program director chuan sawiin, “HIV/AIDS dona kawnga hmalaknate 40% lai tihtlem a ni,” a ti a, Covid-19 leng chu mi tam takin an dampui tawh laiin HIV/AIDS erawh tihdam theih a nih tawh loh avangin ngaihthah chi a ni lo tih a sawi.
AHF hotute tawiawmtu MSACS hotute chuan mipuiten a thlawna condom hman mai tur an neih theih nan leh HIV/AIDS chungchanga mipui zirtirna kawngah AHF leh MSACS an thawhho thu an sawi.
MSACS hotute chuan mipui hnena condom an sem chu a pawimawh tih sawiin, HIV/AIDS vei zingah 70% lai chu mipat hmeichhiatna hman atanga inkai an ni tiin, heng zingah hian condom tel loa hmang an awm thin avangin mipui hnena sem chu tha bera an hriat thu an sawi bawk.
He huna MSACS hotuten an tar lan danin, sorkar kum kal mek, April atanga September thla chhungin Mizoram chhung Integrated Counseling & Testing Centre (ICTC)-ah mi 17,654 endikah mi 796-in HIV hrik an pai tih hriat chhuah a ni a, nu nau pai mi 1,738 thisen endikah HIV hri pai hmuh chhuah 102 an awm.
Mizoram chhunagh kum 1990 atanga kumin September thla thleng khan thisen 8,96,132 endik tawhah HIV Positive 25080 hmuhchhuah tawh a ni a, nunna chan mi 3294 an awm tawh a ni.

Leave a Reply

Your email address will not be published. Required fields are marked *

error: Content is protected !!