India ram chhunga Maoist hel pawlten tharum an thawhna chu kum 2009 atangin 70% zetin a tlem tawh.
Parliament thlasik thutkhawm neih mekah Union Minister of State for Home Affairs Nityanand Rai chuan Nilainia Rajya Sabha inkhawmah kum 2009-a an chetna a thlen tam lai khan vawi 2,258 zet a thlen laiin kum 2020-ah chuan vawi 665 chauh a thleng tawh tih a sawi.
“LWE (Left-Wing Extremist)-te hian remchang an neih angin venhim hna thawktu te, civil mite leh vantlang hmunte an bei nasa thin a. Tunah erawh chuan an chetna hi 70% zeta tlahniam tawhin kum 2009-a an chetna a tam lai khan vawi 2,258 zet a thleng a, kum 2020-ah erawh vawi 665 chauh an chetna a thleng tawh,” tiin Rai-a hian ziaka zawhna a chhannaah a tar lang.
MoS Home hian BJP MP Vijay Pal Singh Tomar-a zawhna chhangin India-a Maoist-ten tharum an thawhna chungchang hi a sawi a ni.
Maoist helho chetna a tlem rual hian an chetna avanga mihring thi an tlem phah leh phah loh pawh minister hi zawh a ni bawk.
Zawhna chhangin, “An chetna a tlem ang bawk hian civil mi leh venhim hna thawktu thi pawh 80% zetin a tlahniam bawk a. A tam lai ber, kum 2010-a mi 1,005 thih phah an awm kha 2020-ah chuan mi 183 chauhvin an thih phah tawh a ni,” a ti.
Minister hian LWE-ho chetna hmun pawh an hual chep zel tawh tih a sawi a. “An chetna ram zau zawk hi a zim zel tawh a. Tunah chuan state pakuaa district 53-ah chauh LWE-in tharum an thawhna hi a thleng tawh a. Kum 2013 kha chuan state 10-a district 76-ah zet an hnuhma hmuh tur a awm,” a ti.
MoS Rai chuan LWE-in tharum an thawhna leh an chetna hmun zau zawk hi kum 2021 kal mekah pawh a hniam zawngin a kal tih a sawi bawk.