November 1, 2018-a Kolasib District Jail-a mi tang damlo thihna chungchangah tan in thuneitute inthlahdah vangah puhin National Human Rights Commission (NHRC) chuan thi chhungte hnenah zangnadawmna Rs. nuai thum pe turin Mizoram sorkar a hriattir.
NHRC atanga ziaka Mizoram sorkarin a dawn danin, Lalropuia (36) s/o RL Roliana, Thingdawl chu MLTP Act vanga man a nih hnuah, August 24, 2018 khan Kolasib District Jail-ah dah luh a ni.
October 31, 2018 zing lamah Lalropuia hian lu na neia insawisel tanin, hemi hnu vek chawhnuah a pum lam fel loh thu tan ina thawktute hnenah a thlen a. A na a ziaawm theih loh avangin he zan dar 11:25-ah Kolasib District Hospital-ah hruai niin admit nghal ni mah se November 1, 2018 zing dar 2-ah a thi.
NHRC report-a a lan danin Lalropuia hi a taksaah hian hliam hnuhma pakhat mah a nei lo va, a thih chhan final report-ah hian ‘acute pancreatitis vanga thi’ tia tar lan a ni.
Lalropuia thih dan chungchangah thil felhlel awma hriain NHRC-a damdawi lama mi thiam rual awmna panel chuan an zirchian hnuah tan in chhungah hian enkawlna mumal tak a dawng lo chu mihring dikna chanvo bawhchhiatnaah puhin, tan ina jail/medical thuneitute inthlahdahna chu state sorkar mawhphurhnaah an ngaih thu an tar lang a ni.
NHRC hian Lalropuia thihna chungchangah Mizoram sorkar chu insawi fiah turin a hriattir mah se, a insawi fiah mai lo a. A vawi hnih nan sorkar chu insawi fiah tura a tih hnuah sorkar chuan Covid-19 hri leng chhuanlamah hmangin hun pek belh turin an ngen leh a. Hun pek belh a nih hnua sorkar insawi thiamna chu pawmsak loin, tan ina doctor rawn tur awm lo chu tan in thuneitute mawhphurhnaah a ngai ta a ni.
Lalropuia hian a na a sawisel laiin tan inah doctor enkawlna dawng mai loin, tan in nurse-in pum na damdawi mai a lo chawh a. Mahse, a dinhmunin ziaawm lam a pan theih tak loh avangin damdawi in panpui chauh a ni a, a hnu darkar thum chhungin a thi ta a. Hei hi NHRC chuan tan in thuneitute mawhphurhna a ni tiin Lalropuia chhungte hnenah Mizoram sorkar chu zangnadawmna Rs. nuai thum chu chawlhkar ruk chhunga pe tur leh an pe ngei a ni tih finfiahna document pawh chawlhkar ruk chhunga pe turin a hriattir bawk.
The Zozam Times thu dawn danin, hetih laia tan in doctor hi Dr. Robert Zingsangzela Thangluah a ni a. July, 2019 khan sawn chhuah niin vawiin ni thlengin doctor dah a la ni leh lo.
&&&&