Covid sulhnu tha lam

  • PL Liandinga

Hripui a lo leng a, kawng tinrengin kan nun a khuahkhirh a. Mimalin hlau lovin rilruin ngam viau mah se midang a kang kai tlat a, chuvangin midang ngaihtuah avangin kan nunphung kan tihdanglam a ngai a. A hri takin a man ve loh te tan pawh khawilaiah emaw chuan nunphung tihdanglam a ngai a.
Nunphung a danglam reng rengin tu tan pawh harsatna emaw, buaina emaw a awm ve ngei ngei thin. A tam zawkah phei chuan chu danglamna chu kan harsat phah hle a. Thenkhat tan phei chuan chhungkaw chhiat deuh vekna thawthang a ni.
Mi pakhat ka hriat chuan sumdawnna bul a tan ve a, a phur chho tan viau mai a, chutihlai chuan a sumdawnna chu hripui chuan a rawn kharsak ta tlat mai a. A sumdawnna tura a pawisa puk te chu rulh ngaihna a awm tak loh avang leh tih chhunzawm zel chu thil harsa a lo nih tak avangin a inhralh ral leh vek a, a bul tan tawh sa chu a thiat chhe vek a. Chu mai ni lovin pawisa engemawzat a hloh zui ta bawk a.
Hmalam pan tura bung thar kai tuma kai leh ta lo chu thu khat, awmphung pangngai a nitin hlawh chhuah ei ve thin tam tak tan chuan ei tur ringawt pawh lungkham tham a lo ni a. Mi thahnemngai leh thilphal leh khawtlang puihna ngawt chuan thui tak a kal theih loh. Zahthlakna te a keng tel a, zahawm lohna te leh inthlahrunna te, hrehawm tam tak te a keng tel ti ila kan tisual lovang.
Hripui chu eng hming pawh ni se, Zawnghri a ni emaw, Khawsikpui a ni emaw, Kawthalo pawh ni se, hripui anga a len tawh chuan a tihbaiawm a, tuna kan hri lek phei chu a hlauhawm dan hi a thuah hnih thuah thum a. A tira kan hmuh leh hriat dan phei chuan a vei tawh chu thih nghal zel tur pawh ni satliah lo, hrehawm taka thih theihna niin kan hria a. Chutah a inkaidarh dan a awlsam em em lehnghal a. Inkhawih mai pawh ni lo, khawih hnu khawih hlek chuan inkai tur a ni zel a.
Hripui a nihnaa a hlauhawmna bakah a vei tam tak thaw a chhamin chuap lamah harsatna a awm a, chu chu natna ril leh mahni inchhunga inenkawl buaithlak tak mai a ni a. Damdawiin kan inchan lova, khawtlangin damdawiin note kan din hial a ngai a. Chutah pawn chhuak thei lovin kan han inkharkhip lehnghal a.
He hripui lah hi a reh har hrep mai a. Kum hnih vel chu kan buai chho ta. Chu chuan kan mimal nun te, kan khawtlang nun leh kan eizawnna nasa takin a nghawng a. Kan hnam tihdan leh kan kohhran kalphung te thlengin min sawi nghing a. Kan tawrhna hi a hluhlang zawnga sawi phei chuan nasa tak a ni.
Hetih karah hian he hripui avanga thil tha kan chhar zinga pakhat ni a lang chu Mizoten Social Media lama kan hun kan pek thin kha tlema thlahdulin lehkhabu lam kan hawi phah nual niin a lang a. Kan duh loh tawp hripui kan tawn avangin kan lo tih hleih theih tawh loh, lehkhabu chhiar lamah mi tam tak kan let leh niin a lang a. Hei erawh hi chu thil tha tak niin a lang. Kan duh vang ni lo mah se, kan hripuiin loh theih lohna avanga min tihtir ni ve si-ah chuan a lawmawm pawl tak a ni vein a rinawm.
Tunhnaiah lehkhabu tha tak tak a chhuak nual a, chung te chuan tunhma, hripui len hma aiin chhiar a hlawh zawkin a lang a. Lehkhabu leh social media hi tehkhin hleih theih loh khawpa thil inthlau ni a a lan laiin a buk rit lo zawk tur Social media hi a chak zawkah a tang titih a. Eng chen nge hetiang hian kan awm dawn hriat theih ni lo mah se, tun dinhmun mai ngaihtuah pawhin lehkhabu lam Mizoten kan hawi leh ta anga lang hrim hrim hi a lawmawm hle. Lehkhabu chhiar thin pangngai tam tak chuan hripui len hma pawhin an chhiar a, Exam pawimawh leh thil tih tak taknaah chuan lehkhabu chhiar mite chu englai pawhin an ding chang thin a. Mahse a Mizo thalai nawlpui ang a lehkhabu kan hlamchhiah ta ni anga lang hi chu ngaihtuah tham fe a awm vein a lang a, chutih laiin lehkhabu chhiar lama hma kan sawn chuan lawmna tur a ni ve bawk.
Lehkhabu chhiar hi engtikah mah a tawp lovin a rinawm hial a. Ram te a changkang zel a, mitinin computer kan thutchilh hunah chuan lehkhabu te pawh hi an la chhuah lo maithei. Mahse mihring khawsak phung leh awmdan han en hian naupang leh thalai tih loh, tu te pawh kan upat hnuah chuan computer thut chilh emaw, phone atanga lehkhabu anga thil chhiar hi chu kan tih vek mai hi a rinawm chiah lo. Kan thangthar zingah pawh lehkhabu chhiar lova mahni phone leh mahni computer atanga tlingtlak tum te hi chu a class sang ber ber ni lem lovin an lang.
Eng pawh ni se kan hripui hi kan duh lo chung chungin kan hrawn ta tho thova, sulhnu tam tak, kan duh loh leh ngainat loh pui pui min hnutchhiah laiin mi thenkhatin lehkhabu chhiar an chin phah ni a lang hi chu a lawmawm khawp e.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427