Chakma foreigner dap chhuah hna a intan leh dawn chiah?
Tunhnai khan MZP hruaitute chu an president Lalnunmawia Pautu hoin Boranpansury-ah an kal a, Chakma pawl hrang hrang hruaitute nen inkawmin Chakma foreigner do tlang turin thu an titlu a, a thlamuanthlak hle rualin, ngaihtuah chhunzawm ngai tak thil a ni.
Chakma te hian MZP hruaitute va lan avang hian an lo sawi ve mai mai a ni ang em, tih pawh zawhna awm thei tak a ni a, an chipui foreigner hi an lo welcome lo tak tak ang em tih pawh zawhna awm thei tak a ni bawk.
MZP president hian Chakma hrim hrim an huat loh thu sawiin, dan lova pem lut, 1950 hnu lama duh duha pem luta, dik lo taka ram leilung fate chanai chuhpuitute chu an huat ber a nih thu a sawi a, hei hi Chakma pawl hrang hrang pawhin an duh dan a nih thu leh MZP te nena inhnerem leh inngeihtlang taka awm an duh thu an sawi a, chhui chian zui ngai tak a ni dawn bawk a ni.
Kan hriat theuh angin Bangladesh atangin Chakma foreigner an lo lut fo a, Mizoram sorkar chuan kum 1950 hnulama lo lutte an pawm loh thu lo sawi fo tawh mah se, vawiin thlengin hmalakna lian tham tak tak a la awm thei lo a, dapchhuah lah an ni ngai hek lo. MZP te hian an theih ang anga dapin, hma an la nasa a, tuna an president in an tanchhan a sawi ngei pawh hi Chakma pawl hrang hrangte hian an zawm dawn em tih hriatzui a chakawm hle.
“Dan anga Mizorama awm, 1950 hma lama Mizorama awm tawh Chakmate hi dan lova lo pem lutte leh luh tum mekte dang tura thawhhopuiah kan sawm che u a ni,” tia sawmna hi sawihona hmuna tawp mai lo hian hmalakna chu tun atangin a awm em tih enzui a tul nghal hle awm e.