Mizoram hmeichhe football team chu Hero Senior Women’s National Football Championship semi-final ah an tling zo lova. Team tha Railways Railway Sports Promotion Board lakah penalty in an tlawm.
Kozhikode a India rama state hrang hrangte hmeichhe football a inelna lianah EMS Corporation Stadium-ah Mizoram leh India rama player tha te laluttu Railways hi 1-1 in hun pangngai leh hun pekbelhah an inhnehtawk.
Mizoram hi semi final lut turin quarter-final ah Maharashtra 4-1 a hneh tawh an ni a. An groupawmnaah Kerala leh Madhya Pradesh hnehin Uttarakhand chu an tlin tawh hnuah an draw.
Thawhlehni zinga inkhelah first half-ah goal a lut lova, Mizoram in Lalthansangi hmangin goal an khung teuh.
Second half-ah inkhel a inhawng zawk a, minute 70-naah Mamta hmangin Railways in goal an khung a. Hei hi Lalnunsiami hmangin Mizoramin huntawp dawnah an sut.
Extra-time ah pawh team pahnih inkarah danglamna a awm thei lova. Penalty hmanga chak zawk zawnnaah Mizoram team atangin Grace Lalrampari leh Vanlalhmangahzuali ten an khung lova. Railways pettu zingah Suprava Samal chiahin khung lo ve thungin 6-5 in an vannei ta zawk.
Hmasawnna a ni
Tun tumah Mizoram team hi Covid 19 hrileng avangin training thla khat vel bak nei hman lovin an inbuatsaih a, hrileng avangin team inko khawm lamah pawh harsatna an tawk.
Heti chung hian state dangte lakah Mizo nulaten football mawi an khel a. Social media lamah Indian football journalist ten Mizoram inkhel hi a danglam bik tiin fakna tawngkam an nei fo.
Mizoram team coach Lalrozara chuan, “Kan naute an kheltha a, an inkhelah han sawiselna tur ka nei lo. Kan vanduai ni a ni a, a khelah pawh kan vanneih ni ni se kan chak thei reng. Goal chance tha hloh kan nei nual a, anni pawhin goal khung tumin min nawr chungin an goal khung pawh kha keini lam kan han chesual zeuhah chauh a ni.” tiin an inkhel a thlirlet a.
A team enkawl chu fakin “Kan player-te huaisenna hi a fakawm. Theihtawpin kan inzir a, game plan kan neih angte khelmualah a takah an chantir ngam tlat a, kan tum ang taka khelh chhuah tumin huaisenna an nei. Kan football khelh a mawi a, a hlauhawm a, team dangten nena kan danglamna pawh a ni.” a ti.
“Kan tlak dan hi uiawm viau mahse kan thlen chinah pawh hian lawmna tur a tam. Kan khingpuite hi a tha thlankhawm an ni a, keini kan inpawtchawp a ni ber a. Pathian in kan chapo lutuk loh nan a tawk a ti a ni mai. Mizoram tan leh hmeichhe football tan hmasawnna a ni a, rahbi thar niin heta tang hian thui tak hmasawnna turin ke kan pen thei dawn.
Kan player-te pawhin helam atang ngaihventu an ngah nghal hle a, chelh beh tum an tam.” tiin a sawi belh bawk.