Helicopter tlaah India sipai commander lawk ber a thi


India-a sipai commander lawk ber chu chhim lam state, Tamil Nadu-a helicopter chesualah a thi tih air force chuan a puang.
Chief of Defence Staff Gen Bipin Rawat, a nupui leh mi dang 11-te hi Mi-17V5 helicopter hmanga thlawk niin Coonoor khawpui bul lawk tlanga tlaah an thi.
A chuang zinga pakhat dam chhuakin damdawi inah dah a ni.
Helicopter a tlak hlimah hian news channel hrang hrang leh chanchinbute chuan a chiang zinga mi pakua thih thu an puang zui mai a, heng zingah hian Rawat-a nupui pawh a tel a; mahse, Rawat-a tak hi engtin nge a awm an sawi lo.
An chetsual atanga darkar ruk vel liam hnuah chief of defence staff pawh chetsualna thlengah hian a thih tel thu an puang chauh a ni.
Kum 63 mi, Gen Rawat-a hi India-a Chief of Defence Staff hmasa ber niin January, 2019 atangin a hna hi a chelh.
Thlalak thehdarh atang chuan an tlakna hmun atang hian meikhu nasa tak van lamah a invawrh chho va. Helicopter hi a kang a, a bul hnaia chengten an thelh.
Helicopter hi Sulur-a sipai hmun atanga thlawk chhuak deuh chiah a ni a, km 100 pawh tling lo, Wellington khaw pan tur an ni a, Defence Services Staff College-a kal tur an ni.
Indian Air Force chuan chetsualna thlen chhan hi an chhui dawn tih an puang tawh a. Prime Minister Narendra Modi-a kaihhruaiin cabinet security committee pawh hmanhmawh takin an thukhawm nghal bawk.
Twitter, Modi-a chuan, “Gen Rawat-a hi Army-a tawnhriat tam tak nei a ni a, ram tana a thawh zawng zawng hi India chuan a theihnghilh ngai lo vang,” a ti.
Defence Minister Rajnath Singh pawhin chhiatna thleng chungchang hi Prime Minister Modi-a a sawipui tawh a, Nilaini zan khan parliament rorel inkhawm neih mekah pawh a sawi rin a ni.
IAF chuan ‘chetsualna lungchhiatthlak tak’ tiin Twitter-a a tar lang a. An chetsual hun hi Nilaini chhun lai vel a ni.
Mi-17V5 chopper hi sipai inthiar kualna leh bungraw phurhna niin India-in thlawhna a neih zinga a upa tawh lam niin vawi tam a chetsual tawh avangin sawisel pawh a hlawh hle.
Kum 2017 khan sipai pasarih chuanna chu hmarchhaka Arunachal Pradesh-ah tlain a chuangte an thi vek a. He helicopter hi training-a chhuak a ni.
A hma kum chiahah hmar lama Uttarakhand-ah sipai drill neia chhuak helicopter chu a tla a, thi leh hliam an awm erawh hriat a ni lo.
Rawat-a hi India rama chief of defence staff nihna chelh hmasa ber niin sorkar laipuiin he nihna a siam thar hi kum 2019 khan a chelh tan a. A hma chiahin sipai atanga a chawlin he hna hi chelhtir a ni zui ta nghal a ni.
Prime Minister Modi-a nena inkawp rem tak niin defence ministry pawh thurawn petu zinga pakhat a ni.
Sipai chhungkua atanga chawr chhuak niin amah thlahtu chhuan eng emaw zat chu Indian armed force-a lo tang tawh an ni.
General pawh hi kum 40 chhung sipaia tang tawh niin a kaihhruaina hnuaiah hian India-in a awp chin Kashmir leh Chin nena inrina, Line of Actual Control velah sipai an lo che tawh thin.
Hmarchhaka hel pawl an tlem chhan lian ber pakhat a ni a, Myanmar nena tlawh kual tawna helho che thin tudaitu anga ngaih a ni bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427