C Lalruaia, MPS, Superintendent of Police, Aizawl chuan zan curfew chuan mi sual veivak a tihtlem avangin thubuai lian tham a tlem phah nia an ngaih thu a sawi.
The Zozam Times zawhna chhangin C Lalruaia hian zan lam curfew kalpui mek hian dan (law) bawhchhiatna kawngah nghawng a nei tih sawiin, “Mi sual veivak a tihtlem phah a, zana lirthei chetsualnate leh thubuai (case) lian pui pui, IPC-a major case ho hi chu a tlem phah a, hei hi zan curfew vangah pawh kan ngai deuh,” a ti.
Aizawl khawpui chhung bikah hian case report pum pui en chuan nikum aiin thubuai erawh a tam niin Aizawl SP hian a sawi a. “A chhan chu Rangvamual kawngah te kan duty a, zu hi kan man nasa a. Chu chuan zu case a rawn tisang ta vak a. Hei hian a pum pui case a rawn titam ta a ni,” a ti bawk.
Aizawl SP hian Krismas leh kum thar vuakvetah dan leh thupek kenkawh kawngah hma la turin tun dinhmunah ruahmanna la siam chiah loh ni mah se, khawpui chhungah zan lam curfew duty hmun 24-a an indah mekte chu an awm tlang tur thu a sawi a. Hei bakah hian Aizawl luh leh chhuahna bik deuh hmun pariatah duty dah belh a, zan lama patrolling pawh an kalpui reng tur thu a sawi.
Tuna zan curfew hun chhung bithliah chungchangah State Executive Committee (SEC) thu a nih angin, sorkarin a ruahman ang anga kalpui a, hun tidanglam tura ngen an tum loh thu a sawi bawk.
Nimin khan Dr Lalhriatzuali Ralte, Aizawl District Bawrhsap hoa Aizawl district chhunga sorkar mi pawimawhte thukhawmin hunpui laiin hri laka himna tura inkaihhruaina te, dan leh thupek (law & order) khauh zawka kalpui an rel a ni.
Aizawl DC Conference Hall-a thutkhawmah hian Krismas leh Kum thar vuakvetah sorkarin SOP a duante chu uluk taka zawm a nih theih nan AMC huam chhung hmun eng emaw zatah executive duty ruahman leh turin an rel a. AMC pawn lamah erawh VLTF-ten hma la se tia an rel bakah, kohhran tinah kohhran hruaitute leh task force-te inberawnin SOP Implementation Committee din ngei tura ngen nise an ti bawk.