Khawvela vaccine siam chhuak tam ber chuan chahtu an tlem tak rih avangin Covid-19 vaccine an siam chhuah chu a zahvein an titlem dawn tih an executive chuan a sawi.
India-a Serum Institute hian an damdawi siam chhuah, Covishield chu dose tluklehdingawn zahve zet siam sa an la nei niin an CEO Adar Poonawalla chuan CNBC-TV18 a hrilh a. He damdawi hi AstraZeneca-in an siam, Vaxzevria ang chi, India-a siam chhuah a ni.
He vaccine hi India rama invenna dose tluklehdingawn 1.3 vel pek tawh zinga 90% zet a ni a. India-ah hian January-a bul an tan atang khan invenna la thei zinga a zahve chuangin an la tawh.
“Ka lo suangtuah ngai lo ang takin a ngaihna hre lovin ka awm a. Thla khatah Covishield hi dose maktaduai 250 ka siam chhuak thin a; mahse, chanchin lawmawm tak awmin India hian invenna hi a mipui tam zawk hnenah a pe tawh a, tunah chuan health ministry-in a chah pawh chawlhkar khat chhungin kan pe zo tawh ang,” tiin Poonawalla chuan a sawi.
“Tunah hian chah lawk pawh kan nei tawh lo va, siam chhuah zat hi 50% vela titlemin a thla biin, India leh ram dang atanga chahtu kan hmuh ang zelin kan siam tawh ang,” a ti.
India-ah hian puitling 85% chuan invenna hi dose khat tal an la tawh hlawm a. Mi maktaduai tam takin a bikimin an la tawh bawk.
India-ah hian booster dose an tih, ram dangin an hman ang chu pek a ni dawn em tih zawhna a awm a, hemi chungchangah hian sorkarin thutlukna a la siam lo.
Serum Institute hian India-a hri kai an tam vanglai, April thla khan ram chhungah mamawhna a san avangin ram danga vaccine a thawn chhuah a titawp a. An firm hi ram rethei zawkten invenna an dawn ve theih nana World Health Organisation (WHO) kaihhruaina hnuaia kalpui, Covax an tihah pawh a firm mala thawh hnem ber a ni a. Vaccine thawn chhuah pawh October thla atang khan a chhunzawm leh tawh bawk.
Poonawalla chuan Covax chuan an chah thin a; mahse, an kalpui muan avangin chuti taka siam chhuah tihpun vakna tham a ni lo niin a sawi.
Ram hrang hrang hruaitute chu vaccine an mamawh dan sawiin an indawr reng tih a sawi a; mahse, India atanga phur chhuak zung zung turin a dahna leh phurh dan tura harsatna an neih thin avangin a chak thei lo niin a sawi.
“Heng ramte hian India-in ni khata mi maktaduai 7/8 vel a pek ang hi an pe ve thei hlawm lo va. Hmanrua an nei tha tawk lo hlawm a, nakum tun ang hunah erawh chuan 60-70% velin pek hi a pung tawh ang,” tiin Poonawalla chuan a sawi.
October thla khan khawvel ram hruaitu hlui 160 chuang leh khawvel hriat hlawh tak takte chuan UK leh ram hausa dangte chu ram rethei zawkten awlsam zawka vaccine an dawn thuai theih nana a phurh leh dahna lama pui turin an lo ngen tawh a ni.