Chief Minister Zoramthanga’n sorkarin Mizoram state Health Care Society (MSHCS)-a mipui sum a batsak chu kumin Krismas hma ngeia eng emaw zat pek chhuah a nih tur a sawi.
Nimina amah hmutu MSU hruaitute hnenah he thu hi chief minister chuan a sawi a. Zirtirtu indaih loh chuangchangah pawh chief minister chuan zirtirtu indaih lohna phurhruk turin SEDP atanga zirtirtu ruai tura ruahmanna siam a nih tur thu a sawi.
MSU hruaituten The Zozam Times an hrilh danin, MSHCS atan kum 2021–22 budget-a sum dah a nih loh chungchang pawh chief minister chu an sawipui a, SEDP atanga ruahmanna an siam zel tur thu bakin hemi chungchang sawifiahna erawh a nei hran lo thung.
Tun thla ni 2-a MSU executive committee thukhawmin 2021–2022 buget-ah MSHCS atana sum dah a ni lo chunga sum senga mipuite in-register-tir chu mipui zah lohna lian taka an ngaih thu an lo sawi tawh a. April, 2021 hnu lama health care bill pek la ni lo leh bill Rs. nuai 3,965 la tang pawh hriatthiam har an tih thu sawiin, MSHCS chungchang chu sawifiah turin Mizoram sorkar an lo phut tawh a ni.